Con e ta bay genera placa ora independisa DPS? Esey pa SEPPA tampoco no ta duidelijk. Y bo ta wak e ora eynan, cu pa SEPPA e problema principal con ta bay pusha e trahadonan aki den un incertidumbre cu nan ta aden awor aki, den un stichting, di cual simplemente pa placa. Simplemente pasobra tin limitacion.
E ora ta bolbe hibabo den un siguiente paso di pregunta cu tin cu haci pasobra cu tambe ta menciona dos cos interesante. E tema di functiehuis, cual ta bisa cu no tabata sa cu e lo mester a bin riba e presupuesto 2018. Pesey no por a percura pa esey a sosode. Pero pa 1 di Januari 2019, hunto cu e trayecto aki di pasamento over pa un stichting, e functiehuis tambe ta drenta na vigor.
Segun Magaly Brito, akinan tin dos cuestion. Berdad ta tende cu tin e situacion financiero di pais Aruba ta asina precario. No tin placa berdaderamente.
Di un otro banda, di berdad minister ta kere cu tur trahado automaticamente ta bay of lo pidi retiro pa drenta den e stichting eynan. Ken no ta bisa cu nan lo kier retiro pa bay den un otro stichting. Ningun otro stichting, por ehempel SKOA, SMOA, SPCOA mes, no ta sinta eynan ta keda warda te cu dia 1 di Januari, pa bisa cu lo tuma e hendenan aki. Nan tambe mester di claridad, dos pa tres luna prome cu aña escolar nobo pa por tin interes, si tin, di esnan cu ta bin for di por ehempel DPS, y pa un of otro alocacion den e fundacion. Esaki mester haya sa paar di luna prome y no warda te cu Januari.
Eseynan ta algun cos cu ta keda den laira te ainda. Apart cu ta tende tambe cu tur cos ta wordo regla, trahado no ta aby atras, pasobra tur cos ta wordo regla den Statuut. Kier sa kico ta wordo regla den Statuut. Con e stichting aki ta wordo lanta.
Di un otro banda ta insisti cu mester negosha un sociaal statuut, unda cu ta regla e posicion huridico di esnan cu si ta desea di bay over, pasobra mester ta conciente, of ta conciente cu tin hende cu si lo kier bay over den e stichting nobo. Tin algun hende cu nan no kier bay over den e stichting nobo aki.
Ainda cu si tin algun hende cu kier bay over, nan kier sa con nan ta bay over, kico ta nan derechonan. Ta yega na e punto cu ta mas interesante pa tur hende, ta e reconocimento. Nan tin un falta di reconocimento di e derecho di trahado. For di momento cu ta bin cu henter e parti cu tin un MB, cu e minister no tabata organisa pa nombrabo como un ambtenaar. Di un otro banda, si bo wak e LMA y bo wak con e trahadonan a wordo trata, semper tabata como ambtenaar y di un otro banda, bo tin cu wak decisionnan di hues, cu tabata tin te cu reciente ainda, unda ta reconoce e trahadonan aki como ambtenaar y aplicacion di henter e LMA eynan y tur otro reglanan pa loke ta nan.
