Diahuebs mainta, Departamento di Impuesto a tene un conferenci di prensa, unda cu a duna un actualisacion loke ta atendiendo cun’e den e dianan aki, principalmente loke ta impuesto di vehiculo di motor, di 2019.
Segun vocero di DIMP, Meverly Romano, a otorga e plachinan di number nobo pa e aña aki. Tur hende por a mira nan caba. Ta trata aki di plachinan oranje cu blanco. A ribici e cargacion di e plachinan aki den luna di December, net un dia prome cu pasco.
Durante e ultimo siman di aña a traha duro pa por a controla e plachinan aki, cual ta basta hopi. Tin un total di 87.116 vehiculo di motor registra.
E cantidad ta considerabel. Despues di a controla tur e plachinan, a cuminsa cu e otorgamento di plachinan di number. Awor aki tin 3 siman ta bezig otorgando e plachinan aki. Awor aki ta na fin di Januari. Dia 31 di Januari a duna e ora un actualisacion pa pueblo di Aruba, comunidad henter, tin un bista y con ta para, con e cumplimento ta tambe, pa loke ta trata impuesto di vehiculo di motor pa 2019.
Servicio
A duna servicio na cliente durante siman, for di 8’or di mainta te cu 8’or di anochi. Tambe a duna servicio riba diasabranan. E ultimo tres diasabranan cu tabata tin, esta 12, 19 y 26 di Januari. Tin cu bisa cu e diasabranan a cuminsa poco slow, pero despues el a pick up un poco. Toch e lo por ta miho. E atendencia riba e diasabranan lo por tabata miho. E atendencia durante siman, tabata mas miho si cu riba diasabra. Loke a nota ta cu e cantidad mas grandi di cliente tabata acudi of ainda ta acudi parti mainta.
Tabata tin cierto dianan cu tanto parti mainta, atardi y anochi, tabata sumamente druk.
Cifranan
Tin actualmente un cantidad di 87.116 vehiculo di motor registra, di cual e categoria mas grandi ta e categoria A. Den e categoria aki tin registra 76217.
E categoria mas grandi cu ta sigui ta e V-car, cual ta 4642 y despues e di tres categoria mas grandi ta MFA, esta brommernan, cu ta 2258.
Den tur e categorianan, a ripara cu na e momentonan aki tin 33.470 vehiculo di motor registra, tin e puesto paga pa full e aña. Esey ta representa 38%. E cantidad di vehiculo pa cual e impuesto a wordo paga, pa mita aña ta un total di 11492. Esaki ta representa 13%.
Den e dos gruponan aki tin di 51% di e cantidad registra cu a cumpli.
Es decir cu tin un total di 44962 number registra paga na e momentonan aki. Esaki ta representa 51%.
Ta resta e ora un cantidad di 39326 number cu ainda no tin ningun pago riba dje. Ta casi 40 mil number cu ainda no tin pago registra riba nan. Esaki ta representa 45%. E diferencia cu falta ainda pa menciona ta e plachinan cu a wordo entrega pa cual e persona of doño a indica cu e no ta bay haci uso di e plachi mas, of ta pidi pa wanta e plachi pa un tempo mas probablemente pasobra e vehiculo di motor no ta den uso.
Esey ta representa un cantidad di 2828 plachi cu DIMP a ricibi for di clientenan cu a pidi pa tuma nan plachi. Di e cantidad aki tin 2590 plachi cu a wordo entrega, cu no tabata tin un debe riba dje.
Personanan cu a entrega nan plachi na tempo, di cual e ora no tabata necesario pa nan tin cu paga belasting. E cantidad di plachinan cu a wordo entrega cu si tin pago pendiente riba nan, ta 238 plachi cu a wordo entrega, sea pasobra e cliente ta declara cu e no ta bay usa e plachinan ey mas of e ta pidi pa want’e pa un tempo.
Si wak e cantidad cu falta, 39326, e ta un cantidad considerabel. Nos ta na final di Januari y esaki ta un cantidad basta grandi di vehiculo di motor cu posiblemente ta riba caminda, cu ainda no tin e pago registra pa loke ta trata e impuesto di 2019 y esaki ta basta hopi, segun Romano.
