Stichting Arubaanse Carnaval (SAC) ta e organo cu a hinca den otro pa haci y organisa e carnaval di Aruba. Carnaval tabata t’ey prome cu SAC y niun hende a discuti esey, pasobra e ta berdad. Pa por haci un organisacion, pa por schedule tur cos di tal forma cu e ta bay nechi, esey ta SAC. Tur cos cu tin riba programa SAC a bin cu nan den diferente area, asina Tecla Kelly, presidente di SAC, a bisa. Ariba e parti di hubentud ta programanan cu SAC a sinta hunto, delibera e partinan cu tabata den e comision hubenil, nan a bisa kico por trece pa hubentud di Aruba. Eynan por bisa cu esey ta parti di SAC.
Segun Kelly, pa por bisa kico tin nobo ta copy y paste. E programa di SAC a uza y a kita un pida aki y pone aya manera ta haci un operacion chikito. El a expresa cu nada ta nobo. E no ta sinti cu a bin cu cambio. Tempo cu henter e problematica a bini, SAC a bisa cu ta bin cu cosnan nobo, hende nobo, ideanan fresco cu ta bon. Te cu awo niun hende no a bin cu idea nobo, un idea fresco pasobra si no sa di e materia no por haci nada, segun Kelly. “Bo ta djis coy un programa di carnaval, bo ta pasa door di dje y bisa ban haci esaki, ban haci esaya”, el a sigui bisa. Pero kico ta pasa ta cu e grupo ora di a haci e cambio pa miho, e pregunta ta pa miho? Esaki ta algo cu Tecla Kelly no ta mira, pero e ta keda na cada hende.
Eynan ta caminda ta bisa si SAC tabata t’ey lo ta miho. Henter aña e organisacion ta traha y niun hende por nenga esey. Tempo cu Milo Croes tabata t’ey Tecla Kelly ta corda cu ora carnaval cla, tur cos ta bay drumi, tur hende tabata bisa cu SAC a bay den “winter slaap”. Despues di tempo SAC a bisa miho nan sigui traha. Si bay bek den antes, ta forma e gruponan den mesun temporada cu carnaval cuminsa. Si carnaval ta cuminsa den januari, e ora tur hende ta bisa cu tin grupo. Despues cu tempo SAC a bisa cu si kier haci algo bon, tin cu haci’e durante aña. Desde delanta tin cu prepara tur cos, prepara kico ta e tema y tambe con pa yega na e hendenan. Esey ta cosnan cu SAC ta sigui traha pa bay dilanti.
Aworaki ta bisa cu cosnan ta bay malo. E por ta bay malo segun nan, pero tabata regula cada cos. Tabata purba di mira kico tabata bayendo menos fout y ora di analisa e carnaval cu a caba di pasa, e parti ey mester a traha riba dje. Segun Kelly, nan tabata bezig riba e cosnan ey. Pero automaticamente si bin cu grupo nobo, e no ta kere cu nan ta expect di duna nan e cosnan pero esey ta nan trabou. SAC a ofrece e minister di e tempo ey, kende ta asina fanatico di carnaval, pa scucha loke SAC tabatin di ofrece. Pasobra nan ta un instituto autonomo cu no tin nada di haber cu gobierno, y tabata dispuesto pa hinca algun hende di dje. Nan lo a siña for di SAC manera Tecla Kelly a siña di difunto Milo Croes. Esey ta algo mas bunita cu tin, pasobra si tur hende mira e assistent cu e tabatin, ta un hende cu a cana cun’e manera el a haci.
Hunto nan a traha y SAC a ofrece esey, pero tanto e minister como e crew a grita y tabata kier ta riba nan so. E ta kere cu nan tabata mira algo cu no tabata existi, manera un fantasma, asina e ta y mira nan awo. Pa awo den 6 aña carnaval ta struggle y di biaha ta busca pa boost e, hopi ta sensacionalismo cu diferente cosnan ey. Carnaval ta cos di pueblo, unda cu pueblo mester ta uni. Evita pa nan bringa cu otro, busca pa ta hunto, bin cu ideanan kico pa haci, ban haci tal cos, anima e hendenan. SAC tabata constantemente den picture y esaki tabata pa anima e pueblo, unda tabata haci esaki pa nan ta na altura. Awo hende ta acerca Tecla Kelly y puntra ki dia tin tal cos, di cual e ta informa nan cu esey a pasa caba. Esey ta nifica cu niun hende ta na altura di nada y esaki ta lamentabel.
Loke SAC lo a haci ta pa tin atencion p’e pueblo, atencion p’e carnavalistanan, atencion p’e musiconan. E ta kere si e musiconan ta realisa esaki. SAC tabata purba drecha tur cos y e manera pa haci miho pa nan, por ehempel e huradonan. E hendenan cu tin di haber cu carnaval mester involucra nan di tal forma cu nan ta sinti parti di dje. Parti di e organisacion y no mester ta den e organisacion, pero parti di e organisacion. Den temporada di carnaval SAC su oficina a habri y tur hende por a yega cualkier momento, pasobra e portanan semper tabata habri.
Si SAC lo ta na mando bek di carnaval, ta keda na esun concerni. SAC a manda un peticion aña pasa, pero minister Andin Bikker a manda bisa di nenga e peticion pasobra gruponan ta bisa cu no kier traha cu SAC, pueblo ta contento cu SMAC. Tecla Kelly ta kere cu si esey tabata asina, cu otro palabra e ta afgewezen. Pa sinta cu e gruponan bek ta keda na nan, pasobra SAC nunca a cera su portanan. SAC nunca a rabia. Tecla Kelly no ta rabia cu nan, pasobra si SAC tabata pag’e un fee, un salario, e lo tabata bringando te awe ainda. E tabata haci esey pasobra e kier y cu amor. Tur cos cu Tecla Kelly gusta haci, e ta haci esey all out. El a traha como boluntario.
Si no tin hende grandi den dje, e ora no tin conocemento y no tin storia. Si mira awo un diferencia den e 6 añanan aki na cuminsamento, ta cu ta pone un grupo di nobato cu no tin conocemento. Pio ainda ta pone un Raad van Toezicht riba nan, y Tecla Kelly ta puntra kico nan sa. Tambe e kier sa si e Raad van Toezicht tabata den un organisacion of den SAC, caminda nan sa con cos ta draai. E bon ta cu SAC tin hendenan cu por conta, pasobra den e organisacion nunca ta secreto cu nan por bisa kico ta kico. SAC ta warda pa mira con cos ta sigui. Tecla Kelly ta spera cu e fin di siman aki e bay rustig. El a mira cu tin un trendt aworaki pa atrai mirones. Tambe e ta desea pueblo di Aruba un feliz carnaval y pa bay disfruta di dje, pasobra despues di diamars otro aña lo tin carnaval un biaha mas.
