UMC Utrecht den diesun aña a yuda 50 pashent recupera oido
Tur aña tin un team ta bin fo’i Hulanda y hunto cu specialista di Aruba ta yuda implanta, esta pone un horea bionico, cerca hende, vooral mucha, cu ta scucha cu un aparato di horea. Segun dr S. Cabenda, KNO arts, ta haciendo esaki desde 2012 caba. Durante e bishita aki a logra opera un mucha y tres adulto. Y interesante pa menciona ta cu un di e adultonan aki ta di Corsou. A opera un total di 50 pashent desde 2012, mita ta mucha y mita ta hende grandi. Y e tempo ey a cuminsa cu e muchanan cu tabata na Scol Scucha Nos (scol special pa hende sordo) y el a bay asina bon te cu e scol no ta existi mas. E muchanan awo por bay un scol normal cu yudansa, pasobra nan ta scucha.
A cuminsa, manera ya indica, dies aña pasa, na 2012. Ta interesante pa menciona cu na 2007 a implementa e neonatale gehoorscreening, mescos cu tabatin na Hulanda. Tur baby di dos siman di edad ta haci un test di horea y si nan ta sordo, e ora por pone nan den e proyecto di implante p’asina nan por cuminsa scucha fo’i chikito caba. Di e manera aki nan ta desaroya casi of igual na mucha cu por scucha bon, pero cu nan implante.
Segun prof dr. R. Stokroos, Hoogleraar KNO UMC Utrecht, e asociacion aki ya a bira un amistad cu un cantidad di persona riba e isla, ya cu a atende hunto un cierto cantidad di pashent. El a splica cu por mira bek riba bon resultado di esaki.
Profesor dr. Stokroos a splica cu mayoria biaha e cantidad di pashent ta cuater, un pashent sea fo’i Boneiro of Corsou y e resto ta for di Aruba.
Segun dr. Cabenda e pashent ta drenta un dia prome HOH, nan ta opera y e siguiente dia por sali fo’i hospital. Tres siman despues ta cuminsa cu e aparato cu lo bay riba e implante, pues cu ta comunica cu ne. Esey ta mas of menos e recuperacion y naturalmente cu ayudo logopedico, nan por yega na compronde bon cu e aparato.
Profesor dr. Stokroos a conta cu el a topa cu mama di un di e pashentnan cu a opera nuebe aña pasa y e por a mira e resultado di esaki, con e mucha por a crece cu tur e ayudo cu el a haya, entre otro na scol. E mucha riba su mes a desaroya bon, por comunica y esey ta duna un satisfaccion cerca e profesor, mirando cu por topa cu nan y cont’e con cos a bay despues di e procedura.
