Team di aresto cu un detention: Sospechoso di drive by keto bay busca pa husticia
Durante ora di atardi, team di aresto di polis a presenta na un cas na Casibari pa asina efectua un detencion relaciona cu e drive by shooting cu a tuma luga na Esso Heights den ora di anochi riba diaranson.
Den careda 6:00 pm diferente unidad di e team special di aresto a presenta na e cas conoci pa husticia den Casibari, caminda a bay pa efectua detencion di e sospechoso relaciona cu e caso cu a sosode ayera nochi laat. Un dama lo a bati alarma na polis, cu su ex-pareha lo a pasa tira dilanti su cas.
Segun informacion na sitio di e suceso ( Esso Heights), e dama aki lo tabata den contacto cu e sospechoso via telefon y na grito tabata bis’e cu e no kier tin nada di haber cu ne mes mas. Cu el a pasa los tiro riba su cas como tambe menas’e cu morto.
Polis a tuma tur dato na sitio y for di akinan e investigacion a cuminsa. No a tarda mucho cu a prepara un entrada hudicial na e cas di e sospechoso na Casibari. Na yegada a bin constata cu e sospechoso lo a logra bandona sitio net na tempo.
No ta conoci si e lo a haya un ‘tip’ of lo tabata sperando yegada na cualkier momento di e team di aresto pero su detencion no a tuma luga e momento ey.
Asina mes un persona a keda deteni. Ta trata aki di e mama di e sospechoso, cu a sali geboei for di e cas y transporta pa warda di polis pa interogacion. Mirando cu ta trata di delito serio di menasa y posesion di arma di candela, e caso ta keda si importancia pa asina trece e sospechoso aki aden y confront’e cu e cargonan aki.
Buskeda ta sigui y no ta descarta cu un ora pa otro ta logra detene e hoben aki, cu segun por a compronde a caba di sali for di KIA pa otro delito cu e mester a sinta castigo p’e.
