Recientemente Minister di Turismo y Salud Publico, Dangui Oduber a biaha pa Miami hunto e CEO di Aruba Ports Authority, Marc Figaroa, pa promove e proyecto di Port City. Ey nan a topa cu e Consul General di Reino Hulandes staciona na Miami, esta Ruth Emmerink. E consul a publica despues riba su pagina di Facebook cu el a keda encanta cu e proyecto ambicioso aki.
Pero a resulta cu e bishita a haya un tinte historico y hasta poco emocional. E motibo ta pasobra Dangui Oduber a bira e prome minister pa bishita e oficina nobo di e consulado, cu awor ta situa na e di 16 piso di e edificio di situa na 701 Brickel Avenue. Esaki mientras cu su tata, ex-Prome Minister Nel Oduber tabata e mandatario cu 20 aña pasa a habri e consulado aki na Miami. E tempo ey Nel Oduber a compaña Minister di Relacionnan Exterior di Reino Hulandes, esta Minister Van Aartsen, hunto cu Prome Minister di Antias, Miguel Pourier.
Cu aprobacion di Minister di Turismo, Salubridad Publico y Deporte na aña 2019, a inicia e transformacion di e area caminda nos waf ta situa. E obhetivo ta pa converti e area aki den un Port City, un area atractivo y vibrante pa Oranjestad. Tanto pa nos localnan como tambe pa nos turistanan, door di combina uzo di recreacion, residencianan y negoshinan. Port City lo conecta hende, e zona urbano y e ciudad di Oranjestad y tambe nos lama Caribense. E plan ta consisti di un area di aproximadamente 20 hectar y lo inclui un parke hopi grandi accesibel pa publico. Inversion total di e proyecto aki ta calcula na 550 miyon Dollar cu un duracion di 10 aña, di locual 500 miyon lo ta inversion di inversionista y contratistanan priva.
Hopi aña di preparacion
Desde e mita di decada 90 diferente gobierno a formula plannan pa mehora e cuidad di Oranjestad, cu miras riba transformacion di e terminal di carga. Ora e terminal di carga a move pa Barcadera, a bira tempo pa cuminsa e proyecto di transformacion di mas grandi den historia di Aruba. Port City lo ta unico den ambos e vision y escala. Cu un parke publico dilanti e lama (waterfront park) combina cu desaroyonan di “real estates” comercial, desaroyonan residencial, hotel estilo boutique, edificionan pa oficina, den combinacion cu areanan recreacional. E configuracion di tur e funcionamentonan aki lo crea un ambiente di cuidad (city vibe), pero manteniendo e caracteristicanan cultural di nos isla. E area cu lo desaroya, lo ta di unda e terminal crucero ta actualmente te cu e beach di Bushiri y e lo inclui un caminda cu bunita bista pa lama y espacio pa parkeo.
Creando conexion
E vision principal pa cu e transformacion di e area aki ta pa crea conexion na un manera sostenibel. E intencion di Port City ta pa crea un cooperacion combina entre organisacionnan den diferente zona na Aruba, sin cu ta baha balor di otro areanan. E proyecto lo complementa y fortalece Oranjestad por completo, creando oportunidadnan economico nobo. E conexion cu e beach di Bushiri ta di mesun importancia ya cu e inclusion di e area di beach publico aki lo aumenta e apelacion di Port City y reduci e presion riba e otro beachnan di Aruba. Pesey ta rekeri pa desaroya e area cu ta rondona Port City simultaneamente. Lo desaroya e beach di ex-Bushiri pa comunidad tin acceso na un beach nobo y drecha.
