No ta prome biaha cu team di aresto ta faya y drenta adres robes. Ora bo drenta un cas pa un entrada hudicial bo mester ta sigur di loke bo ta haci. Pa cuminsa respetando nan trabou, e entrada hudicial den un cas no ta agradable pa esnan den e cas.
E forma cu Arestatie Team ta drenta ta hopi brutal y ta laga un famia trauma. Si bo a drenta cas corecto no ta problema. Pero ora bo drenta cas di famia honesto y drechi cu un actitud agresivo y ta adres robes e ta laga un sabor amargo. Ademas ora nan yega ta kibra porta di cas etc lagando daño. Atrobe si ta cas corecto no tin problema.
Pero no por drenta cas robes y kibra porta spanta esnan den cas y djey djis bisa despensa nos a drenta adres robes y sali bay. Bo mester ta sigur di bo entrada hudicial den situacionnan asina. Ora e hoben den cas a pidi pa splicacion mas bien bise keda keto y hala un banda.
A bay na camber di su tata kibra porta y despues a constata cu ta adres robes nan a drenta. Esaki ta e entrada hudicial relaciona cu e droga cu a yega den e boto diaranson mainta. A drenta adres robes Caya Bohi #9 y ora Arestatie Team a comete nan blunder atrobe, a bisa sorry ta na Caha Bohi 19 nos mester a bay.
Mescos cu otro biahanan cu a drenta cas robes, e caminda cu e doño di cas mester cana pa nan drecha su porta ta uno largo. Nan ta drenta cas robes, kibra porta y djis bisa sorry y abo mester bay mira con ta bay drecha bo porta. Ta caminda largo y perdemento di tempo prome cu haya bo porta drecha.
No ta prome famia inocente cu ta pasa den e cos aki. A ripara si cu Arestatie Team ta un team cu mag comete blundernan asina pero nada ta pasa cu nan. Ta manera esaki ta e team intocable di mando policial. Ora bo drenta un hogar asina bo ta kibrando privacidad di un hogar. Spera cu nan sigui haci nan bon trabou pero haci esaki den e forma corecto.
Mas cu un biaha drenta cas robes y sali ileso djis cu un sorry, na dado momento ta bira dimas cu e daño emocional cu ta keda atras. Y pa colmo Ministerio Publico ta bon na altura di tur e cosnan aki pasobra nan tambe ta envolvi.
Lo sigui e caso aki di cerca pa mira cuanto dia lo dura pa nan drecha e porta na otro entrada hudicial robes y e biaha aki na Caya Bohi #9 den Mabon.
