Tata di Sarahi Sierra, esta Ruben Sierra a bisa pafo di Corte awe cu e ta masha descepciona cu e sentencia cu Hues a dicta awe mainta. Corte a reduci e demanda di bida largo pa 20 aña di prizon contra e acusado sospecha di a secuestra, viola y asesina su yiu muhe Sarahi Sierra na November 2017.
E tata a bisa awe cu durante tratamento di e casonan el a tende di tanto acusacion, tanto cos cu e acusado a comete, tanto prueba cu a bin padilanti, tanto testigo, pero toch no ta dune bida largo den prizon. E no sa ainda si nan lo pidi Fiscal pa apela, pasobra mester papia cu demas famia prome.
Ruben Sierra a bisa cu for di basta tempo caba el a nota un comportacion dudoso di e acusado Jairo Chalgut. Aunke e ta toca nan na famia, toch e no tabata convenci di su forma di anda. E no por a bay mucho den detaye pasobra ta cosnan personal y cu por afecta mas miembro di famia. Djis cu e si a señala un comportacion dudoso pero nunca e por a pensa cu e drama aki lo a bay finalisa dje leu asina.
Tur loke Ruben Sierra kier pa su yiu ta husticia. E ta bisa cu e sentencia awor, Jairo Chalgut lo ta liber despues di sinta 12 pa 13 aña caba, pero su yiu muhe si no lo regresa nunca mas.
