Corte di Prome Instancia awe a dicta sentencia den e caso penal contra Jairo Chalgut di 47 aña di edad. Fiscal di Ministerio Publico a pidi bida largo pa e acusado, pero Hues, teniendo cuenta cu circunstancianan y falta di prueba di husticia, a baha e castigo na 20 aña di prizon. Ambos Fiscal como e acusado tin 2 siman pa apela e sentencia, den caso cu nan no ta di acuerdo cune.
Abogado mr. Demis Illes pafo di sala di Corte a bisa cu e sentencia ta basa riba locual Corte por a prueba. E hecho cu Fiscal no por a prueba cu e acusado a horta 1100 florin durante e acto, a pone cu Hues no por a uza e sentencia maximo. Si a prueba secuestro, violacion y asesinato.
E abogado a splica cu ainda e no a papia cu su cliente, pues no por bisa ainda kico lo bira nan decision relaciona cu e opcion di apelacion. E acusado, te awe ainda, ta para riba cu e ta inocente y cu e no a comete ningun di e actonan cu awe a conden’e p’e.
Jairo Chalgut ta envolvi den e caso conoci cerca autoridadnan como caso FIST cu ta e asesinato cu a tuma luga dia 3 di november 2017 den un cas na de Vuyst y unda e victima tabata e hoben Sarahi Sierra di 19 aña.
Fiscal a acusa Jairo Chalgut di intencionalmente tuma bida di un persona riba 3 di november 2017, dor di choke, stik’e, hink’e cu un obheto skerpi y/of dal’e cu un obheto stompi. E violacion di e persona, secuestro y/of ladronicia di un suma di placa cu tabata mas o menos 1100 florin, tabatin como consecuencia e asesinato.
