Fundacion Pa Nos Comunidad (FPNC) hunto cu Monique Drent a tuma e iniciativa e aña aki den luna di juli pa cuminsa cu un accion di donacion di Back to School na Hulanda. Esaki a inicia cu e meta pa manda e tasnan di scol recolecta na Hulanda p’e muchanan di menos recurso di Aruba. E proposito di esaki ta pa Fundacion Pa Nos Comunidad como organisacion beneficiario distribui e tasnan di scol aki na e muchanan di menos recurso.
E bunita iniciativa caritativo a inicia durante e periodo cu Monique Drent a cuminsa traha como boluntario na FPNC pa reparti paketenan di alimentacion na famianan di menos recurso. Durante e pandemia di COVID-19 a referi hopi famia na Aruba a na Fundacion pa haya ayudo. Pa motibo di retonan financiero y problemanan social cu famianan di menos recurso ta enfrenta, algun di e muchanan cu ta forma parti di e constelacion di famia tin dificultad den nan desaroyo academico, directora di FPNC Gianiaka van der Biezen a bisa.
Den cuadro di esaki FPNC kier a brinda e grupo di muchanan di menos recurso e mesun oportunidad cu esnan mas afortuna pa por tin e articulonan di scol necesario pa continua nan estudio cu exito. Den un periodo cortico e accion di donacion lansa na Hulanda via radio/television y media social manera Facebook y Instagram. Dunadonan por a duna nan aporte door di cumpra tasnan di scol duradero cu ta consisti di por lo menos ocho articulonan di scol pa alumnonan di scol basico. E articulonan di scol aki ta pen, agenda, kleurpotlood, stift, schrift etc.
E tasnan aki cu ta completamente ekipa cu lo necesario y por a wordo entrega na diferente establecimento na Hulanda. Amistadnan di Monique Drent a encarga pa por tin suficiente espacio disponibel den nan hogar pa por a warda e tasnan recolecta. Mayoria donateurs cu hopi entusiasmo y cu un curason grandi manera e artista Mario Gonsalves y Miss Planet Aruba 2020 Angelique van Varsseveld a participa pa e bunita accion di donacion. Den su totalidad a logra yena binti caha di mudansa completo cu tasnan di scol completamente ekipa. E compania di mudansa ‘Jan de Jong verhuizingen’ na Groningen a pone disponibel cahanan di mudansa.
Pa e transportacion di e tasnan di scol di Hulanda pa Aruba Drent a ricibi cooperacion di Marinierskazerne. E personanan di contacto di Marinierskazerne Savaneta ta Paul Evers, Guido y kazerne adjudant Arthur van Hofwegen tabatin na nan encargo ehecucion di e plan di transporte. Cu e proposito pa comienso di september transporta nan cu Zr.Ms. Pelikaan pa Aruba.
Ayera a entrega e donacion di tasnan di scol na Monique Drent y directora di e fundacion, Gianaika van der Biezen. E team di FPNC cu su boluntarionan lo ta encarga pa e distribucion di e tasnan y lo percura pa esakinan yega na nan debido destinacion. Na tur e dunadonan di Hulanda cu a haci nan bunita contribucion y especialmente Fred y Monique, Ellen y Ellis masha danki. E team completo di FPNC ta sumamente gradici cu e bunita gesto aki.
