Aruba Airport Authority N.V. (AAA) den presencia di Aruba su Minister di Turismo Dangui Oduber, CEO di ATA Ronella Tjin Asjoe-Croes, CEO di AHATA Tisa LaSorte, jetBlue General Manager AUA/CUR Karen King y otro partner y stakeholder a yama bonbini na jetBlue su vuelo inaugural for di Newark (EWR) pa Aruba (AUA).
E aña aki JetBlue ta lansando 24 ruta nobo cu e meta pa di forma inmediato genera entrada y capta trafico riba un serie di ruta nobo y nonstop – varios di nan e aerolinea nunca a bula y Aruba ta contento di por ta un di e destinacionnan scohi pa e aerolinea partner di 14 aña. A identifica Aruba como un di e mercadonan cu jetBlue ta anticipa cu lo crece den demanda cerca e pasaheronan cu kier bay cu vakantie.
Apesar di ta den un scenario global diferente, e ekipo di Aeropuerto di Aruba a maneha pa celebra y yama bonbini na e vuelo inaugural aki cu un cantidad limita di invitado, mientras a percura pa sigui tur protocol pa garantisa e salud y seguridad pa tur persona invita.
“Nos ta hopi contento cu jetBlue, nos aerolinea partner di 14 aña y actual di dos carrier mas grandi pa Aruba a dicidi di expande su presencia cu vuelonan directo pa Aruba for di New York – Newark riba diasabra y diadomingo abordo di jetBlue su Airbus A321 neo. Ofreciendo tambe vuelo for di Fort Lauderdale, JFK New York y Boston, esaki ta jetBlue su di 4 gateway pa Aruba como un di e destinacionnan esencial for di unda nan ta brinda nan servicio hopi exitoso “Mint” cu a lansa na 2015 riba vuelonan selecta.
E vuelo inaugural aki ta prueba cu compromiso, confiansa y bon trabou den ekipo entre jetBlue, Aruba Airport Authority N.V. y tur otro partner esencial y stakeholder ta factornan importante den e exito do un aerolinea y e destinacion. Nos ta hopi sigur cu e servicio for di Newark lo ta un otro servicio exitoso mas riba e network di ruta di jetBlue,” asina CEO di AAA CEO Joost Meijs a bisa.
E vuelo inaugural aki ta parti di e strategia di jetBlue pa acelera su recuperacion y genera entrada den e situacion di biahe actual y pa Aruba, esaki no por a bin na un miho momento como destinacion turistico. E ta sirbi tambe pa un confirmacion y testimonio di un aerolinea su habilidad pa move capacidad rond; obstante e retonan financiero y operacional cu nan ta enfrentando actualmente.
