Manera tabata di spera, Rectorado di Colegio Arubano, cuminsando dialuna mainta cu medidanan extra di siguridad relaciona cu tip ricibi siman pasa di un supuesto “shooting”.
Den un carta manda pa mayornan, Rectorado a informa cu e testnan ta sigui normal e siman aki, pero mester tene cuenta cu ta bay tin extra control y vigilancia na e instalacionnan di Colegio Aruba.
Esaki ta nifica cu tur hende cu drenta, nan ta wordo rista, na curpa como den nan tasnan. Den e mesun carta a haci apelacion na mayornan pa papia cu nan yiunan y controla e tasnan prome cu Sali pa scol y si ta posibel pa bini solamente cu material necesario pa e testnan. Y na final mayornan mester percura pa e hobennan bandona e tereno di Colegio Arubano mas lihe posibel.
Nan a sigura mayornan cu no tin motibo pa bay den panico.
Dialuna mainta por a mira cu berdad tin personal di siguridad extra poni, na ambos entrada di Colegio Arubano y tambe na e parti di Ciclo Basico. Tambe por a mira personal di Rectorado na e puntonan di control pa mira y sigura cu tur cos ta bay segun regla.
Melding
Ta prome biaha cu tin un melding asina serio haci na Colegio Arubano. No tin mucho informacion divulga di e tip cu autoridadnan a ricibi, pero si ta papia di “shooting”, algo cu a binta sosodiendo hopi na Merca. Tabata diabierna ultimo cu CA a ricibi un email cu menasa, for di un adres desconoci. Nan a pone autoridadnan na altura di esaki y mesora a cuminsa cu nan mesun investigacion y a bisa di ta den contacto estrecho cu instancianan concerni local y internacionalmente.
Den pasado si tabatin por ehempel bom melding, cu mayoria di e biahanan ta sosode net durante e temporada di CP y SO, mandando papel cu e menasa di bom riba dje. Tabatin momento cu hasta a tira donderboos den e WC, causando destruccion. Na momento cu tin p.e. bom melding, ta evacua tur studiante pa instalacion di Compleho Deportivo Guillermo Prospero Trinidad.
