Director di SABA Remo Kock a duna un amplio splicacion riba e situacion cu ta bibando aden entorno dificultad financiero na dicho fundacion. Ta conoci cu pa algun tempo caba ta buscando manera pa yega na minister/na gobierno pa un solucion definitivo cu SABA.
Den transcurso di tempo e SABA a cambia di un instancia di estadia pa hende mayor, cu tabata gosa di bon salud pa un cas di cuido caminda a haci peticion pa brinda asistencia medico na e adultonan mayor cu mas y mas tabatin mester di cuido medico ademas di un luga di estadia. Gobierno a haci adaptacion pa asina cubri, bou hospital, e gasto cu tabata envolvi no un pero na e momento aki tres specialista encarga cu asistencia medico na e pashentnan cu ta hospeda den SABA, esaki ta un splicacion breve cu presidente di e hunta di supervision David Meijer, a duna di conoce prome cu a pasa palabra na e director .
Ambos tabata den studio di Enfoke diaranson merdia pa asina splica poco mas kico ta locual cu en berdad ta pasando. A enfatisa cu riba e ponencia cu a bin ta cuestiona asunto di ‘jaarrekening’, e institucion a bin ta entrega esaki for di aña 2017 contrario na locual cu kier insinua. Locual cu mester clarifica cu tin categoria ora ta haci accounting y pa yega na un audit (cu ta e standard di mas halto) tin su proceso canando pa por yega na esaki.
Contra tur contra tempo cu a presenta, incluyendo pandemia, SABA tabata transparente y a duna tur cooperacion durante investigacion for di 2022 na momento cu e minister a haci peticion pa inicia cu esaki.
“Si corta, nos ta bay failliet”
Esey ta e situacion na e momentonan aki y ta locual cu e director a duna di conoce. Kier corta pero e lo bin a costo di salario/ pan di cada dia di trahado di e institucion, esey ta e unico manera cu lo por corta, esta kitando hende for di trabou.
SI opta pa cera e localidad na San Nicolas, lo tin cu re-ubica trahado pero te dia di awe no tin claridad riba subsidio cu SABA lo bay ricibi di gobierno pa tuma un decision concreto. Ta supone cu na final di 2022, gobierno lo mester duna di conoce ki suma lo pone disponibel na subsidio pa asina cada instancia por planifica y organisa su mes cada aña. Te awo aki, no tin claridad y no a haya informacion, tanten cu esaki no tuma luga no por tuma decision riba e accion cu SABA lo tin cu bay tuma pa su continuacion.
Via corte tin palabracion/ compromiso cu gobierno lo paga entre otro vacantiegeld, cu tin cu pasa den luna di juni, pero ta algo cu na e momento aki no tin ni siguridad ni concreto pa confirma esaki. Segun e compromiso cu gobierno a duna, lo cumpli cu esaki pa asina no cliente ni trahado sali perhudica na ningun momento pa locual ta trata pago.
Si no tin claridad riba suma di subsidio lo tin cu cuminsa nenga cliente nobo y mira si esaki lo por wanta e golpi poco na falta di sosten financiero. Ademas cu tin un lista basta grandi di adulto mayor wardando pa por haya un luga na un di e casnan di cuido aki, e fondo cu a scucha via via cu gobierno lo bay pone disponibel pa SABA, no lo ta suficiente pa tene e casnan aki operacional.
Si acaso e intencion di gobierno lo ta bay bek na un ‘bejaarden tehuis’ cuido regular, anto e comision cu ta instala door di gobierno mes, cu tin entre otro wit gele kruis, hospital y diferente otro entidad di salud mester sa e ora cu na momento cu bay cuminsa tuma hende, e cuido lo ta diferente y no lo por bay tuma pashent como cu no por bay duna nan e cuido medico cu ta ofrece actualmente 24/7.
Grandinan cu a traha pa Aruba cu mester y merece e cuido aki di parti di pais.
Situacion cu minister
Conseho cruel/iresponsabel di un accountant di CAD a indica cu e subsidio adecua lo mester ta igual na un di e casnan chikito regular y basa riba esey gobierno/minister ta considera e suma cu lo apunta pa SABA. Ta un diferencia hopi grandi entre e cas di cuido regular y locual cu ta brinda medicamente na un verpleeghuis.
Intencion di yega na combersacion cu minister a trance completo. Un dado momento minister no kier a papia cu ne mas. A bay diferente carta pero envano y a pidi pa papia unicamente cu e raad y no cu e directiva di SABA.
Ta pendiente dialogo di parti gobierno. Pa e minister encarga cu a tuma un postura basta cera, ultimo mail cu a ricibi tabata uno cu por bista te hasta for di sla pero Kock ta keda habri pa yega na solucion. Tin di informa bon cla si, si acaso sigui tras di advies di un accountant cu no sa ni e diferencia entre cas di cuido y verpleeghuis, como Rubiano cu e ta, Kock a indica cu si nan haya menos placa nan ta bay failliet.
E minister cu ta responsabel pa e cuido di hende grandi cu ta sufri di malesa cronico, kico e ta bay haci e momento ey? Si e situacion sigui bay asina aki lo bin un calamidad den cuido di nos grandinan. Un suma bou 21 miyon no lo ta factibel, riba 23 miyon lo yuda pa sobrevivi. Un suma desea pa garantisa bon cuido na nos grandinan, e ideal lo ta 27 miyon.
Remo Kock a indica cu nan tur ta traha cu curanson pa e grandinan, ta pidi gobierno: “Yuda mi noh”
