Museonan ta contribui na e bienestar y na desaroyo sostenibel di comunidadnan y nan tin e
oportunidad pa fomenta cambio positivo. Tin diferente manera cu museonan por contribui pa yega na
SDG’s (Sustainable Development Goals)/ metanan pa desaroyo sostenibel. Por sostene accion encuanto
cambio di clima, aporta na inclusividad, yuda combati isolacion social y yuda na mehora salud mental.
Manera ta stipula den e resolucion di ICOM “Riba sostenibilidad y e implementacion di e Agenda 2030,
Transformando nos mundo” (Kyoto, 2019), tur museo tin un rol den e creacion di un futuro sostenibel.
Por haci esaki entre otro cu programanan educacional, exhibicionnan, programanan comunitario y
investigacion.
Cada aña desde 2020, Museonan ta enfoca riba metanan SDG di Nacionnan Uni. Den e cuadro aki
MANA-Museo Arqueologico Nacional Aruba, tambe ta aporta na e metanan aki.
Por ehempel Meta 3 Salud Mental y Bienestar: Sigura bidanan saludabel y promove bienestar pa tur
edad, en particular salud mental y isolacion social. Durante e prome periodo di Covid 19, a habri
exposicion permanente bek pa publico apenas den 6 siman despues di ciere total na Aruba. A percura pa
cumpli cu tur rekisitonan di siguridad. Pueblo di Aruba por a bishita y distrai e mente den un periodo
hopi dificil, na un forma sigur. Alabes a cuminsa ofrece mas informacion digital y a desaroya hunto cu
Museonan di FMA un programa vacacional digital. Tambe tabata tin e opcion pa busca un pakete pa
vakantie pa esunnan cu no tabata tin e posibilidad pa sigui e programa online. Asina a contribui pa yuda
combati isolacion y posibel depresion, en special cerca mucha y hoben cu no tabata por a bay scol e
periodo ey.
MANA ta ofrece tambe guia y of actividad pa por ehempel grupo di grandinan, personanan cu limitacion
(visual) y mas. Tambe ta duna e servicio di hiba informacion na un manera atractivo cerca gruponan
meta pafo di MANA. Asina ta trece e museo cerca esunnan cu kisas no tin e manera of oportunidad pa
yega MANA.
Fin di 2022 a tuma luga un simposio na MANA cu representantenan di e.o. Region Caribe cu a bin hunto
pa intercambio di e.o. conocemento tradicional encuanto cambio di clima y con pa ta mas resiliente den
esaki. Akinan a invita representante di pueblonan nativo, cu a intercambia nan conocemento y
pensamento cu publico. Esaki ta cuadra cu Meta 15 Bida riba Tera: Proteha, restaura y promove uzo
sostenibel di sistemanan ecologico y reforsa e bosnan di lider indigena y hisa conscientisacion riba e
perdida di biodiversidad.
Riba Mei 18, nos kier encurasha tur hende pa pensa kico nan mes of hunto cu Museo of otro instancia
por haci pa contribui pa yega na desaroyonan sostenibel y bienestar di un y tur. Semper por tuma
contacto cu MANA via [email protected] pa cualkier idea. Nos ta desea Museonan, tur trahado,
boluntario- y bishitantenan un feliz Dia Internacional di Museo 2023!
