Gerencia di CITGO Aruba buscando representacion sindical di Sindicato FTA

Diabierna dia 22 di februari 2019 entre 8:30am pa 11:30am ta tuma luga un referendum na Refineria CITGO, den cual Mediador di Gobierno ta verifica si tin interes pa empleadonan di CITGO ARUBA REFINERY afilia na Sindicato FTA. E referendum ta tuma luga den oficina of e clinica na e entrada principal di CITGO na San Nicolas.

“Nos ta buscando pa representa e miembronan di gerencia, pues e staff local di e refineria”, asina Hubert Dirks, Presidente di Sindicato FTA a duna di conoce awe mainta, net prome cu e sali pa Trinidad pa representa Aruba den un reunion di ILO. “Ta trata aki di mas o menos 50 empleado”.

Hubert Dirks, Presidente di Sindicato FTA

Ta conoci cu e sindicato IOWUA – Independent Oil Workers Union of Aruba, ta representa mayoria di e trahadonan di e refineria. Den pasado semper FTA a representa trahadonan di e contratistanan. Gerencia como tal no por ta den e mesun sindicato cu su trahadonan, como tal a opta pa pidi representacion sindical di FTA.

Den e referendum aki, Mediador di Gobierno lo mester verifica si mayoria di esunnan cu derecho di voto, ta sostene FTA. Si esey ta e caso, anto FTA lo por drenta y cuminsa representa gerencia.

E scenario aki ta surgi net awo cu e refineria ta pasando dor di hopi reto, debi na e problemanan politico na Venezuela. E sancionnan impone dor di Gobierno Mericano tin efectonan directo pa e operacion di Refineria PDVSA cu indirectamente ta doño di CITGO ARUBA REFINERY. Entrada di FTA por wordo interpreta tambe cu e managernan kier sigura nan condicionnan di trabou, memey di e turbulencianan y incertidumbre bou cual nan ta trahando.