Pa seguronan di malesa y accidente, SVb ta cobra prima. E ora cu nan tin full un bista kende ta paga of no. Den e cobramento di prima pa seguronan di malesa y accidente, tin un cobransa hopi efectivo segun director di SVb, Edwin Jacobs.
Pa loke ta trata e pensioen di biehes y e pensioen di viuda y huerfano, e cobramento di prima ta den man di belasting. SVb no tin un bista di ken ta e dunado di trabao cu ta paga belasting. No tin un bista kende ta e asegurado cu ta paga e prima. Loke ta nifica e ora, cu pa e parti ey SVb no tin un control y monitoreo. Loke si ta busca pa wak si ta ricibi e prima mas of menos bon, ta locual bisa cu si haci calculo a base di e trahadonan sigura cu tin. E prima naturalmente mester aumenta. Si e baha un caminda, tin un problema di non compliance, di no cumplimento. Esey tin cu bay papia cu Belasting. Kisas acelera un plan cu tin planea caba cu belasting, cu ta e match informacion entre SVb y Departamento di Impuesto, si berdad ta kere cu tin un grupo di dunado di trabao cu no ta cumpli, segun Jacobs.
Ora cu a cuminsa intercambio a informacion cu Dimas, a ripara cuanto trahado cu permiso, cu mester tabata inscribi na SVb no tabata inscribi. A base di e informacion eynan, Parlamento a tuma e decision di a otorga SVb e autoridad pa impone multa riba dunadonan di trabao cu no ta cumpli cu e seguro pa nan trahadonan.
SVb tin un protocol di intercambio cu informacion cu Belasting. A keda di cristalisa esaki tambe, den detacha un trahado di SVb na Departamento di Impuesto, pa match informacion. E ora bo por cera e posibel buraconan cu por tin cu dunadonan di trabao no ta cumpli cu nan obligacion y por lo tanto por perhudica e fondonan cu SVb ta administra, segun Jacobs.
Sancion
E cumplimento di primanan di SVb awor aki a aumenta sinembargo, ainda SVb ainda no tin e datonan pa nan por analisa, con halto e primanan aki ta. Segun Jacobs, ta importante pa tin un bon comunicacion entre SVb y Departamento di Impuesto, pa sa kico ta pasando cu e primanan cu nan ta ricibi for di dunadonan di trabao, cu ta bahando.
Na final di dia Departamento di Impuesto tin diferente instrumento, entre nan multa, pa nan por sanciona e dunado di trabao cu no ta cumpli cu nan obligacion di declara y paga. Na Impuesto tin dos forma. Tin cu declara e prima y bo tin cu paga e prima. No sa tambe si tin un discrepancia entre kico ta wordo declara y kico ta wordo paga. Na Belasting tin cu paga prome cu dia 15, unda tin cu entrega e aangifte biljet y bisa ki tanto tin cu paga. Pero no necesariamente loke bo ta bisa bo tin cu paga bo ta paga. Por ta tin un diferencia den esey of por ta loke ta declara cu tin cu paga, no ta locual realmente nan tin cu paga. Por ta na SVb nan tin mas trahado inscribi cu nan tin na impuesto. Eynan ta e match di informacion cu tin cu tuma luga pa por wak precies kico ta pasando. Cu e situacion ey, tin SVb preocupa cu nan cifranan ta mustra algo diferente loke impuesto ta duna.
Cuanto ta acumula pa luna
Awor aki SVb ta hayando 21 pa 22 miyon florin pa luna y esey tin cu aumenta tiki tiki, segun Jacobs.
Pensioen di biehes tambe ta calcula entre 21 y 22 miyon florin pa luna. Pa SVb ta hopi importante e entrada, pasobra e entrada ey tin cu crea e surplus cu tin mester pa por sigui fortifica nan reserva. Na e momento aki e ta suficiente, pero e mester ta mas cu suficiente pasobra e primanan mester surpasa e gastonan suficientemente bon, pa por hinca den e reserva. E reserva ta importante pa crea pa 2024 padilanti.
