Diasabra atardi pa mas of menos 5:10 pm a sosode un accidente riba caminda di Santa Cruz, na altura di Napa Auto Parts. Chauffeur di un auto marca Mitsubishi, modelo pickup L-200, numera A-2319, a perde control, bolter y bay para bek riba su cuater tairanan. Testigonan a spanta y a bati alarma na polis mesora, pidiendo pa asistencia y paramediconan na e sitio, pensando cu e chauffeur lo a resulta herida.
Sinembargo na yegada di e prome unidad di polis a constata cu e chauffeur no tabata herida y e no a desea ayudo medico tampoco. Polis a puntra e chauffeur si e kier pa ambulance bin pa e bay haci un check-up mirando cu e pickup a bolter y por haya “whiplash”. Asina mes el a insisti di no kier bay hospital y cu si e sinti dolor despues, cu e mes lo busca ayudo medico.
Daño material no ta dje tanto ey. E auto ta sigura y e doño mes lo drech’e. Con e accidente a sosode ta un poco misterioso pasobra e chauffeur no a dal contra ningun otro auto. Su so cu su so bayendo di Santa Cruz direccion Oranjestad, a perde control, baha caminda, bolter y bay bek riba su cuater tairanan. Mas cu djis un susto, e no tabata herida ni tabata sinti dolor na ningun parti di su curpa.
