Sindicato TOPA a informa su miembronan di e proposicion di Gobierno, relaciona cu e pakete di medida cu kier impone desde inmediato, te cu december proximo. Directiva di e sindicato ta na fabor di e cambionan, pero miembronan awo ta cuestiona si nan tin un mandato pa dicidi tal den nan nomber. Ta kehando cu no a manda email ni nada ma e miembronan, pidiendo un aprobacion of desaprobacion di e proposicion. Ta sinti falta di transparencia y participacion real di e miembronan.
Proposicion di Gobierno:
Lo kita 5% di salario di tur empleado publico y tur cu ta riba payroll di Gobierno.
- Ta kita 50% di Vakantie-uitkering, Reparatie-premie na Augustus 2020 y Gelijkbedrag na November 2020. Esaki lo suma un total di 12.6%
- For di e pensionadonan lo kita 50% di nan Gelijkbedrag na November 2020
- Empresanan Estatal tambe to mester baha salario, vakantie y bonus
- Ministernan y Parlamentarionan lo baha nan salario cu 15%
E medidanan aki lo ta temporal, lo drenta na vigor dia di 1 Mei te cu 31 di December 2020 y segun TOPA, ta pa yuda 37.000 trahado cu lo a perde trabao den sector priva.
“Nos pensamento di parti di Directiva ta cu nos mester ta solidario cu nos rumannan cu lo a perde trabao y no tin ningun entrada. No solamente esey, pero si nos no bay di acuerdo cu e proposicion na unda gobierno ta spera un contesta mas pronto posibel e ora nos mester ta realistico unda esaki pronto lo toca nos tambe. Si no yega na un acuerdo aki 3 luna nos tambe lo ta den mes un incertidumbre, asina Rene Bernabela a comunica na su miembresia.
“Directiva di TOPA ta bay pa Aruba. Nos ta spera esey di nos miembronan tambe. Si tin cu bisa ora ta asina leu cu nos fronteranan habri bek cu lo no ta bay ta manera antes mas, lo bin cambionan drastico den futuro y esaki lo siña nos pa cambia nos mentalidad. Nos lo keda pendiente pa boso sugerencia y comentarionan”, asina Bernabela a termina bisando.
