Stichting Sportsubsidie Aruba ta contento di por contribui cu ‘Ban Move Camp 2018’

230

E temporada di vacacion escolar a inicia y un bes mas ASU den colaboracion cu IBISA ta organisa un campo di vacacion pa nos muchanan.

Den e ultimo anjanan e ‘Ban Move Camp’ a bira masha popular y mirando e participacion grandi a dicidi di ripita e actividad aki cu ta conta cu e sosten di Stichting Sportsubsidie Aruba y su stakeholdersnan.

Durante 3 siman largo, di 9 te cu 27 di juli 2018, e accomodacionnan deportivo di Centro Deportivo Betico Croes na Sta. Cruz, Sportcentrum San Nicolaas(IBISA) na San Nicolas y Centro Deportivo Frans Figaroa na Noord lo entretene alrededor di 100 mucha pa localidad, den e edad 6 pa 14 anja . Cada dia e muchanan ta haya actividadnan di movecion manera futbol, volleyball, beach volleyball, coremento di bicicleta y diferente weganan cu tin di haber cu traha hunto, yuda otro, crea amistad, sinja algo nobo, ect. Tur participante a ricibi un t-shirt mientras tur dia ta ofrece 1 sandwich, 1 juice y 1 fruta. Edad di hobennan lo wordu dividi den grupo mucha muher y mucha homber mientras e orario lo ta di 8or di mainta te cu 1or di merdia. Ta cuminsa na Sportcentrum San Nicolaas(ibisa) cu lo ta e dianan 9 pa 13 di Juli 2018 sigui pa 16 pa 21 di Juli na Centro deportivo Frans Figaroa y lo culmina e Ban Move Camp e dianan 23 pa 27 di Juli na Centro Deportivo Betico Croes.

Mirando di e importancia pa tene nos muchanan ocupa cu actividadnan di movecion y den forma sano, Stichting Sportsubsidie Aruba hunto cu su partnernan ASU y donacionnan di Lotto, E Loteria di Aruba a yuda subsidia grandemente den e subsidio di e actividad pa nos hobennan Ban Move Camp 2018.