Diadomingo un biaha mas holo malo a afecta e barionan di Mahuma, Parkietenbos, Buena Vista, Simeon Antonio y Bucutiweg. Hasta te na Aeropuerto y Hotel Hyatt Place e holo malo cu ta bin di e dump di Parkietenbos, di Barcadera y di Ser’i Teishi a yega.
Recientemente Stichting Parkietenbos y varios ciudadano di e barionan, entre nan varios adulto mayor a duna testimonio na esunnan di Oficina di Maneho di Crisis tocante di e sufrimento cu e habitantenan ta pasando aden. A wordo splica na tur e miembronan di e Oficina di Crisis y e expertonan y hefenan di departamento presente cu e rosea di e habitantenan di e barionan a wordo comprometi y esaki ta un violacion di derechonan humano segun World Health Organisation.
E habitantenan a perde e derecho di hala rosea di aire limpi pa motibo cu for di diferente direccion tur dia, aire cu holo malo ta drenta e barionan. Mainta trempan cu e biento di pariba e holo di e desperdicio dera bao di tera na Ser’i Teishi ta yega den e barionan, esaki ta duna e habitantenan, stress, dolor di cabes, alergia y molester di wowo. No ta tur dia e aire ta hole mesun fuerte, sinembargo e gasnan di desperdicio cu ta putri bao di suelo, varios di nan no ta hole pero si por ta toxico. Ayera diadomingo, un biaha mas biento a cay y despues a bira, treciendo e holo malo di e dump di Parkietenbos den cas di e habitantenan. Pues na sea cual sea e direccion di biento, e habitantenan ta sinti molester di e aire contamina.
Awor e bisiñanan a descubri tambe con serio y grandi e contaminacion di lama y e tera di lagun di Bucuti ta. Tin muchanan cu a bay cana canto di lagun y a trapa den santo cu en bes di blanco of bruin a bira preto y azeta a sali. Expertonan local a informa Stichting Parkietenbos cu mester sanea e lagun sino e ta sigui contamina e areanan mas pabao di nos costa y lama. Mester contene e contaminacion por medio di sanea e causa y esey ta e dump di Parkietenbos mes. Stichting Parkietenbos a urgi gobierno pa ataca e desastre ambiental aki cu un plan total, un instancia cu reputacion y experticio, preferibel di Hulanda of Merca, lo mester haci un estudio profundo y rapido pa detene e contaminacion den e lagun, sanea e dump di Parkietenbos y para e deramento di desperdicio cu ta tumando luga na Ser’i Teishi.
Gobierno y Parlamento mester concentra na aloca e fondonan necesario urgentemente pa remedia e situacion actual y pa traha riba un solucion total y duradero, sin cu un pueblo tin cu bira victima di practicanan di dera desperdicio cu no ta sostenibel ni saludabel. E habitantenan kier hala rosea di aire limpi atrobe, manera tabata antes y pa sanea nan lagun cu semper nan a landa y pisca.
