Directiva di Ambiente Feliz ta confirma cu awe mainta a ricibi un suma parcial di e projectsubsidie di locual a acorda caba pa e proyecto Cas Briyante na San Nicolaas. Cu e suma aki e fundacion por cubri e gastonan di salario y exploitatie te fin di juli 2023! E futuro di e localidad Cas Briyante ainda no ta sigur, mientras cu no tin claridad ki dia Gabinete Wever-Croes II lo cumpli cu resto di e subsidio.
Si e fundacion no ricibi e suma necesario pa por cubri e gastonan di augustus te cu fin di december 2023, e fundacion lo ta obliga pa cera su portanan na fin di juli y manda no solamente su empleadonan, sino tambe e clientenan cu ta depende di cuido profesional nan cas!
Directiva a manda varios carta desde september 2022 pa entre otro Minister di Husticia y Asunto Social y Departamento di Asunto Social indicando cu no a cumpli cu e subsidio pa e proyecto pa aña 2023. Directiva nunca a ricibi un contesta!! E fundacion ta spera cu awor si Gabinete Wever-Croes II lo ta mas transparante den e proceso di subsidio y lo por informa e fundacion debidamente den un tempo cortico ki dia e fundacion lo ricibi e otro parti di e proyectsubsidie.
Stichting Ambiente Feliz, un fundacion funda na october 1986, ta brinda servicio residencial na persona cu multiple limitacion intelectual. Na september 2021, cu fondo di Sociaal Crisisplan, e fundacion a habri nan localidad yama Cas Briyante na San Nicolaas. E localidad situa na Palisiaweg ta ofrece cuido intensivo na persona cu tin 6 aña of mas cu multiple limitacion. E clientenan ta depende completamente di e cuido di guianan profesional cu ta traha hunto cu otro specialista di otro fundacion pa mehora bienestar y desaroyo di e clientenan.
