Qredits Aruba conhuntamente cu Ministerio di Asuntonan Economico, Comunicacion y Desaroyo Sostenibel, cu sosten di Ministerio di Transporte, Integridad, Naturalesa y Asuntonan di Adulto Mayor a inicia e di dos “AGRI Business Academy y “Kick-Off” oficialmente cu un total di diescinco participante.
E programa educacional aki su enfoke ta pa stimula y fortalece “Entrepreneurship” den e sector di Agricultura na Aruba.
AGRI Business Academy ta un programa personalisa cu e meta pa educa, guia, y stimula e personanan cu ta aspira pa bira un agricultor comercial. E programa dinamico aki lo ofrece e (futuro) empresarionan e oportunidad pa expande nan conocemento y obtene experiencia como un empresario exitoso den e sector di Agricultura.
Den transcurso di diesdos siman e participantenan lo ricibi diferente lectura relata na e industria di Agricultura y “tools” necesario pa planea y maneha nan propio negoshi. Tambe lo bishita diferente compania existente den e sector aki. Na final cada participante lo desaroya nan plan di negoshi y plan financiero y lo haya e oportunidad pa presenta nan propio idea di un producto/servicio durante e “Pitch Event.”
Un gradicimento ta bay na Minister Geoffrey Wever y Minister Ursell Arends pa sostene e proyecto aki cu sigur lo haci un impacto significante pa e sector di Agricultura na Aruba.
Qredits Aruba ta conoci den e sector empresarial por medio di yuda varios comerciantenan cu micro financiamento te cu AWG 100,000 pa cuminsa y expande nan propio negoshi. Qredits Aruba tambe ta sostene empresarionan via coaching, recursonan y programanan educacional.
Pa mas informacion por bishita Qredits su Facebook page “Qredits Aruba”.
