Diadomingo atardi famia, colega, amigo, conoci y simpatisantenan di Parlamentario Benny Sevinger a bolbe yega na e area pafo di KIA na Santo di Patia pa asina demostra nan sosten pa e politico cu ta cera pa interogacion den caso Avestruz.
E congregacion, cu a inclui riba 60 auto, a bin como parti final di un dia di campaña lidera pa Sevinger su yiu muhe, Stephanie. El a indica cu e biaha aki e grupo ta mas grandi pasobra unda cu nan bay, ta hayando reaccion di hende cu kier uni na e causa paso nan ta mira e inhusticia di loke ta sosodiendo cu su tata. “Nan tambe kier sostene pasobra no ta husto cu riba un isla cu ta supposed di ta democratico, cu ta supposed di ta fair, esaki por pasa.”
Desde cu Sevinger a keda deteni dia 26 di mei ultimo, su yiu muhe a tuma e liderazgo di su campaña. “Nos ta sigui difundi e mensahe di mi tata. Nos ta sigui bay cas pa cas y nos lo sigui bin akinan pa sostene mi tata te ora nan lag’e bay.”
