E persona cu tabata un rehen pa varios ora largo na Tanki Leendert ta na bida awe. Esaki ta danki na e forma profesional cu Polis a handle e situacion. Polis a haya informacion cu tin un homber arma cu un dama den cas. A papia di arma blanco na prome instante. Tabata sospecha tambe cu e homber por tin un arma di candela. Polis a haya tip riba esaki. A prepara un team pa negocia cu e homber. Tabata habri porta y asina comunica cune. Finalmente a prepara tur cos pa tur situacion cu por presenta. Profesionalnan di slachtofferhulp, Team di Aresto, hefenan di Polis etc ta parti di esnan cu a ser avisa. Mescos a avisa ambulance pa standby. Despues di casi cuater ora e team di aresto a kibra drenta y asina pone fin na e situacion existente. A logra libera e dama y boei detene e homber. E homber ta di naci na Republica Dominicana y tin un status ilegal na Aruba. E dama ta un persona di nacionalidad Colombiano. Personal di ambulance a mira e situacion di e dama y e tabata ok. Entre Polis y Prensa tabata tin un bon cordinacion. A wanta tur informacion pa asina evita cu e sospechoso paden por a sigui kico tin pafo.
