Pastoor Marcel Balootje: papay mustra bo yiu e Dios cu bo ta sirbi

Ta siman di tata y diadomingo awo ta dia di tata, y nos tur sa e importancia di un tata den cas.

Tata su luga den cas ta esencial, Dios mes a dun’e e posicion ey pa e guia su famia den boluntad di Dios.

Tur tata ta responsabel dilanti di  Dios pa nan hogar y nan yiunan. Bijbel ta bisa nos cu e homber cu no ta provee pa su yiunan ta pio cu un pagano, 1 Timoteo 5:8.

Tur bo yiunan mester ta dirigi na Señor pa bo mes bienestar y di comunidad.

E luga di un tata ta dificil pa reemplasa, pero tampoco ta algo di manipula cu ne. E ta mas cu un deber e ta un yamada di Dios cual bo tin cu cumpli cu ne.

Tin hopi tata  ta lubida cu nan mester duna cuenta na Dios, 72% di mucha cu ta cay cera ta muchanan cu no tin tata den cas y sigur hopi mucha cu ta cay den embaraso hubenil tambe ta motibo cu no tin tata den cas. Un tata su deber pa splica su yiu homber pa no cana saca mucha muhe na estado, pasobra esey no ta bon.

Hopi tata kier duna nan yiu tur cos material, placa cas, auto, telefon, scooter, etc. Pero ke hubo di presenta e Dios cu bo ta sirbi na bo yiunan.

Bo yiunan ta mira den bo un muestra cu abo ta sirbi Dios? Ora bo ta coregi bo yiunan, a base di kico bo ta coregi nan, for di cual fundeshi bo ta saca bo coreccion, ken ta e modelo y di ken bo ta depende?

Esey ta un problema hopi grandi cu nos tin awendia, cu hopi tata kier coregi y pone ordo pero nan mes no ta un modelo pa nan yiu wak riba dje.

Den e buki di 1 Cronicas Capitulo 28 vers 9 David ta papia cu Salomon su yiu bisando: Pa loke ta abo, mi yiu Salomon, conoce e Dios di bo tata y sirbi Dios cu henter bo curason y cu un alma boluntario, pasobra Señor ta scrutia tur curason y ta compronde tur intencion di pensamento. Si bo busca Dios  lo bo haya Dios. Mas si bo bandona Dios E lo rechasa bo pa semper.

David  tabata conoce Dios y por a recomenda Dios na su yiu. Den e tempo trabahoso cu nos ta biba, como tata bo mester ta consciente cu bo yiu mester di Dios. Pero nos ta concentra riba tur sorto di cos, pero poco riba Dios. Ta p’esey nos no tin pia Spiritual pa para riba dje como tata.

David  ta bolbe ripiti den  1 Cronicas  28:20 na Salomon.

Sea fuerte, tene curashi y actua. No tene miedo, ni cay flauw, pasobra señor Dios, mi Dios, ta cu bo. E lo no faya bo, ni bandona bo. Ora un mucha ricibi un palabra asina di su tata, ta imposibel cu e por bay cana den gang y busca arma pa defende su curpa, pasobra su tata a bis’e ken ta  e Dios di su tata y cu e Dios di su tata por bira su Dios tambe.

Tin hopi tata cu nan Dios ta: whisky, droga, adulterio, auto, etc. Y pa e motibo ey no por instrui nan yiu den un caminda di Dios. Pero abo como tata tene na cuenta cu bo mester cumpli cu e boluntad di Dios. Esey  ta pa bo instrui bo yiu  den caminda di Dios.

Tur tata, ban tuma tuma tempo pa pordona , respeta y restaura bo famia de nomber di Hesus.