Despues cu a bira conoci cu tin casonan confirma di Coronavirus na Aruba, mesora Gobierno a tuma e decision pa cera tur scol, incluyendo e speelschoolnan cu muchanan menor di 4 aña di edad. Cu esey, desde e di dos siman di luna di maart, tur mucha ta na cas y mayornan sea mester a pidi vakantie pa keda cu e muchanan cas of mester paga otro hende pa mira pa nan. Pero, awor por lo menos un di e speelschoolnan ta purba cobra mayornan toch, hasta pa dianan cu nan NO a habri pa brinda servicio!
Mayornan awor ta evaluando pa acudi na Minister Glenbert Croes cu ta encarga cu maneho social of na Minister Presidente, debi cu a cera tur scol pero awor e cabesante kier cobra e mayornan toch. Ta mas cu logico cu e scol mes, siendo un instancia priva cu ta gana placa, awor lo mester cubri pa e luna cu no a traha y despues di esey, si no por habri pa motibo di e decision di Gobierno, cu e juffrouwnan lo mester para den fila na FASE mescos cu 25 mil otro trahado cu ta perdiendo nan trabou debi na e Coronavirus.
Pero pa pidi mayornan, cu tambe a perde nan trabou of a bay cas sin pago, of cu a forsa nan tuma vakantie obligatorio, pa riba dje nan paga pa scol cu no ta habri y no a cuida nan yiunan durante e luna. Banconan a duna tres luna di gracia, Departamento di Impuesto, FCCA, Island Finance y asina por sigui menciona y net scol priva ta tuma un postura di cobra toch!
Den e carta e scol a skirbi cu “Nos di &^%$#*&^ semper ta cla pa brinda sosten te unda cu nos por. Mientras cu tur cos a dal para, nos obligacionnan financiero di tur luna si ta sigui core. Nos ta compronde cu e situacion cu nos ta aden na e momento aki ta dificil pa nos tur y ta pesey mes lo evalua e obligacion mensual di cada alumno a base individual. Tur mayor cu pa motibo di e crisis aki no lo por cumpli cu nan obligacion mensual lo mester contacta mi persona y pa esnan cu si por cumpli, nos ta gradici Bo cu Bo sosten di semper. Esaki lo ta di gran ayudo pa asina nos logra paga nos maestranan pa nan dianan di trabou y asina den e situacion dificil aki purba alivia nan precupacionnan den e momentonan aki”.
Minister Glenbert Croes a papia di “no work no pay” pero den caso cu un instancia, manera e crash di Bo yiu tabata cera pa casi tres siman caba, no a brinda servicio na Bo, toch e por cobra Bo? Esaki no ta responsabilidad di e doño di e scol cu tur tempo a gana tanto placa cu e negoshi aki di speelschool? Awo cu mundo henter ta den crisis, e cabesante ta pensa cu e mayornan lol sigui paga, pa e no mester asumi responsabilidad pa paga su trahadonan y benta esey riba e mayornan cu tambe ta pasando den e mesun reto. Ta asina dificil pa e scol compronde cu ta mundo henter ta den crisis y esey ta nifica cu e tambe!
