Un “Task Force” ta un organisacion temporario crea specialmente pa resolve un problema particular. Entrante awe 31 di maart e task force crea pa controla esunnan den cuarentena forma pa personal di Departamento di Salud Publico (DVG) y Cuerpo Policial di Aruba a cuminsa bishita e prome casnan.
Por bisa cu riba e prome dia di control, e task force a controla 28 cas di cual no a logra localisa 1 persona na su adres, pa cual motibo e persona a haya un multa di Afl. 1000,=.
Departamento di Salud Publico y Gobierno ta alerta tur esunnan cu a wordo instrui pa DVG pa bay den cuarentena, pa nan mantene nan mes na esaki y no sali for di cas bou ningun circunstancia. Obedece e instruccion aki a pesar cu porta bo no tin ningun sintoma pa evita di sigui plama e virus. Tambe tin un facebook page asigna unda comunidad por raporta di forma anonimo tur esunnan cu no ta cumpli cu e orden implementa riba dje. E facebook yama: https://www.facebook.com/covid19arubahacibodenuncua
Esun cu no cumpli cu instruccion di DVG lo haya un multa pa incumplimento riba orden di cuarentena.
