Den e raportahe di Sociedad Interamericana de Prensa relaciona cu e tema delicado di “Libertad di Prensa” den cada pais, a duna atencion na e situacion reinando na Aruba. E Gobierno nobo (MEP-POR-RED) eligi na September ultimo, ta acusa medionan di parcialidad, ta cumpra pa e Gobierno anterior (actualmente opositor) y ta menasa pa impone leynan pa regula contenido den e asina yama “Ley di Medio”.
Segun un informe di e Sociedad Interamericana de Prensa, e Gobierno nobo, bao di mando di e Prome Minister mr. Evelyn Wever-Croes, a expresa su preocupacion den algun rueda di prensa riba publicacionnan unda cu informacionnan a filtra, na cual e ta cualifica como “noticianan falso.” Siguidonan di e Gobierno, a realisa campañanan via radio y rednan social pa casnan comercial y publico en general boicotia medionan di comunicacion y ta aplike tambe den nan promocionnan.
Gobierno ta propone pa inclui un ley di medionan imprimi y electronico, argumentando cu orden publico ta na peliger y ta menasa cu sancionnan contra esunnan cu publica noticianan “falso”. Gobierno ta discrimina publicidad oficial den medionan critico.
Como prueba di e maneho anti medionan critico, na December ultimo, Presidente di Parlamento, mr. J.E. Thijssen a prohibi entrada den edificio di Parlamento na e periodista Nelson Andrade, cu ta di un medio cu Gobierno ta considera “opositor” y como represalia pa un reportahe critico. Corte a dicta na fabor di e periodista, bisando cu no por nenga entrada na e luga na ningun reportero.
Parlamento no a keda satisfecho cu e sentencia di Hues y a opta pa apela e veredicto, uzando e mesun bufete di abogado unda e Parlamentario ta(bata) traha.
