SMOA: Nunca a ricibi carta di ALV y SIMAR no ta para tras di ALV

1122

Directiva di SMOA a haya fo’i diferente docente keho di bullying entre docente y por actua cu man duro pa stop esaki, ya cu esaki ta contra tur norma y ley. Ta parce cu tin un grupito di docente cu ta bully otro docente pa firma pa asina haya poder awo cu e rector a bandona e scol y, ta haci esaki a base di mentiras. Esaki ta loke ta aparece den un declaracion di Stichting Middelbaar Onderwijs Aruba (SMOA).

Tambe SMOA ta bisa cu nan a mira un carta den media firma door di un hende. E no tabata dirigi na SMOA, pero door cu ta acusacionnan falso, a contesta riba tur punto cual SMOA tin prueba di dje. Si, tabatin algo di berdad, nan mester prueba esaki y bay OM haci denuncia.

Cerca SMOA, tur cos ta wordo controla door di e departamento di accounting den scol y un compania di accounting pafo ta dobel check esaki. SMOA ta un di e poco institutonan cu ta percura tur aña pa su jaarrekening ta na ordo y ta manda copia pa Ministernan, Departamento di Enseñanza, Departamento di Finansas, Algemene Rekenkamer, Bisdom y Centrale Accountantsdienst.

Directiva ta lamenta cu ta tira cu lodo cu mal intencion door di supuesto presidente di ALV. SMOA nunca a ricibi carta cu e meneer aki ta e president nobo di ALV. ‘Y nos no sa ken e meneer ta representa ni a base di kico. Pero si e meneer tin curashi di molestia y instiga nos docentenan, strobando e school di duna bon calidad di educacion na nos studiantenan.”

SMOA ta sigui bisa cu nan ta traha a base di Good Governance y nunca ALV a pidi un meeting y nunca SMOA a ricibi un carta di keho pa ultimo tres añanan por lo menos. Directiva di SMOA ta solamente traha a base boluntario y gratis pa supervisa y conseha schoolleiding y no ta encarga cu uitvoering.

SMOA ta den contacto cu varios grupo di scol y tur menos uno ta papia y sinta na mesa. Tur hende kier paz y papia den bon comunicacion pa resolve cualkier problema cu por tin. Si president nobo di ALV tin e interes di nos studiantenan y su coleganan na pecho, e lo stop cu su actitud di instiga y bully, zorg pa e duna educacion ariba nivel y comunica cu SMOA directamente na luga di uza prensa pa acusacion falso y kehonan sin investigacion of wederhoor.

SMOA tambe tin miembro den vakbond y tin bon comunicacion cu vakbond. E procedura semper ta pa dialoga prome, despues carta y despues vota pa protesta of bay media si mester. No omgekeerd. Y SIMAR no ta para tras di ALV.

Hunto cu e management team nobo – SMOA ta haci tur cos na su alcance pa recupera e tempo perdi door di Covid-19.

E bon noticia ta cu e muchanan ta bayendo bon, scol a habri y cu;

– Inspectie a aproba pa tin summer school como remediering,

– tambe SMOA ta cumpra bukinan direct for di proveedor y asina logra pa reduci e gastonan pa mayornan,

– SMOA ta sigui cu mantencion den zomer.

SMOA ta existi di un Directiva profesional, drechi y responsable.