Docentenan di Colegio Aruba: Ta BASTA. Nos kier retiro di directiva

5459

Cuerpo di Docente di Colegio Aruba y un grupo di otro trahado awe a dicidi di expresa nan malcontento cu directiva cu ta maneha e scol.  Un maneho cu e docentenan ta sinti ta perhudica e studiantenan. Nan a hasta manda carta pa Bisdom pa expresa tur nan preocupacionnan, di cual un copia a bay pa Prome Minister Evelyn Wever Croes.

E docentenan awe merdia a sali for di cura di scol cu borchinan cu frasenan cu nan ta sinti ta un forma dictatorial di hiba maneho di e directiva, manera “Ik bepaal”, “wees stil”, y a presenta cu e borchinan aki pero tambe cu nan bocanan tapa pa mustra cu nan no tin derecho pa papia y hasta a bisti na preto pa ilustra cu nan ta di luto . Mirando esaki, nan ta pidi pa un directiva completamente nobo.

Docentenan di Colegio Arubano den protesta pa malcontento cu directiva

Posted by 24ora on Wednesday, June 3, 2020

Un miembro di comision di docentenan di Colegio Aruba, Vilma Lardi kende tin40 aña na Colegio Arubano,  34 aña trahando na Colegio y prome tabata eynan como studiante, a hiba palabra. “Semper mi bos a resona den klas. Awe nos kier pa nos bos resona pafo di Colegio y den henter comunidad.”

Awe Colegio Arubano ta di luto. Maestronan a keda den silencio pa algun aña pa no afecta e alumnonan, p’esey e delaster recurso pa uza ta accion. Pero dado momento, el a splica, mester resona bos pa haya oido. Mayoria di docente tin un gran disgusto cu loke ta pasando na e scol. Apenas dos aña despues cu Colegio a haya un rector nobo, pasobra no por traha cu e directiva, el a dicidi di ta tuma su retiro. Un directiva cu docentenan no tin confianza den nan. Nan no ta traha na bienestar di alumnonan.  Nan no tin ningun afinidad cu enseñanza. Nan no ta transparente den maneho financiero pa cu scol. “Nos ta puntra nos mes si e directiva ta traha pa e scol progresa of tin otro motivacion, “ e docentenan ta puntra.  

Cu e accion aki e docentenan kier a vocifera nan inkietudadnan y preocupacionnan cu ta existi pa tres aña caba na e scol. “Awo nos a bisa ta basta. A entrega na Obispado un carta expresando nos desconfiansa pa cu e directiva y ta pidi pa su retiro total di inmediato. Esaki ta e unico forma pa trankilidad por reina bek na scol.” Despues di a lesa e declaracion, e vocero di e docentenan a expresa cu nan no ta contesta pregunta.

Actonan c u nan ta cuestiona ta entre otro con e directiva a lanta dos stichting  paralelo cu esun original, pero tambe e hecho cu tabatin 8 rector den 9 aña cual ta mustra cu tin algo no ta bayendo bon.