Andre Bosman: Pueblo mester ta consciente con cierto procesonan a tuma luga na Serlimar

Andre Bosman, Parlamentario pa partido VVD na Hulanda, a haci declaracionnan pisa pero tambe a cuminsa saca documentonan relaciona cu e empresa local SERLIMAR. Informacionnan cu e Parlamentario a bisa, den entre otro Tweede Kamer, ta cu esakinan ta hole na corrupcion.

Bosman den combersacion cu 24ora.com a bisa cu el a haya masha hopi informacion di proceso y proceduranan cu no a bay manera debe ser. Hopi di e informacionnan ta cerca e instancianan concerni, y Parlamento tambe, y e Parlamentario ta kere cu pueblo tambe tin derecho di haya e informacionnan aki, y si nan por a haci otro escogencia.

El a dicidi di publica e informacionnan pasobra awo e tin mayoría di documento y a dicidi di haci esaki publico. E no ta solamente pa pueblo pero tambe Parlamento y Ministerio Publico comprende kico ta pasando y cual escogencia a ser haci, cu algo cu a costa hopi placa y si tin hende a wordo previlegia.

Live cu Andre Bosman riba caso SERLIMAR

Live cu Andre Bosman riba caso SERLIMAR

Posted by 24ora on Tuesday, June 2, 2020

El a menciona e sistema di incinerator y e destaho di esaki; tabatin diferente oferta entrega pero tambe tabatin informacion cu no ta tur e interesadonan tabatin tur e informacionnan necesario. Esey ta algo straño.

El a bisa cu e no tabatin contacto cu Ministerio Publico riba e tema aki, pero na mesun momento a señala e falta di un Procurador General, cual vacatura ta bashi pa dos aña caba. Ta necesario pa e instituto(nan) aki tin e team necesario pa haci investigacion, pa saca si un persona ta culpabel of inocente mas lihe posibel. Un persona no por cana rond pa largo tempo sin sa kico ta bay pasa cu ne.

Ta importante pa tur hende ta consciente cu tin un proceso canando y cu mester percura pa no duna bentaha na amigonan y gobernantenan no mester mete.

Haciendo e publicacion cu el a haci, segun e Parlamentario, no ta nifica cu e ta mete den asuntonan interno. Loke e publica tabata disponibel pa tur hende tuma conocemento di dje.