Den KIA e situacion ta hopi tenso. No tin maneho den KIA awor aki. Aunke minister Andin Bikker ta purba pa papia bunita pa lunanan largo di plannan etc, tog e situacion ta full diferente.
Desde cu e gobierno aki a sinta no tin un director den prison. Ta depende riba un director interino cu segun e mesun trahadornan no ta apto pa maneho e prison. E ta yen di miedo y no kier duna ok pa accion. Ora kier actua e ta manera stopnan.
Cuidadornan di preso ta mira cu cada biaha cos ta empeora y nan bida ta mas na peliger cada biaha. Den KIA tin varios cuidador cu ta corumpi tambe cu e presonan. Keto bay ta drenta scondi cu telefon cellular. Con esaki ta drenta no ta conoci. Ta kere si cu tin e mesun cuidadornan cu ta hincando tur e cosnan aki. Rond di KIA ta basta bon vigila. E entrada di cosnan illegal manera telefon ta wordo haci dor di e cuidadornan mes a cambio di placa. Nos mesa di redaccion mes ta hayando informacion di paden. Nos tin contacto cu e presonan cu ta informando cu nan ta bay lanta. Nan tin plannan serio.
Minister Andin Bikker no ta duna atencion na Kia. Su prioridadnan ta full otro. No tin programa pa e presonan rehabilita y ta cla corehi pa asina drenta mercado despues di sinta castigo. Esey no ta tur. E costo pa preso den KIA a bira impagable. Presonan a laga sa caba cu cosnan mester pasa. Cos mester bay for di man. KIA ta yen y ningun hende ta haya libertad pa bay cas. Cuminda ta malo segun e presonan a informa nos. Nan ta papia hasta di kima e prison un biaha mas. No tin recreatie nada den KIA. Prijsnan ta subi den e supermarket den KIA. Asina tin hopi cos pasando den prison cu tin basta preso y nan famia preocupa.
Cuidadornan honesto tambe ta sinti cu tin cos na caminda. Nan ta sinti e presonan hopi keto ultimo dianan aki y esaki ta un mal señal. Parce cu e cuidadornan corumpi mes no ta presenta ora cu e cos bira cayente. Mientras cu nan mes ta contribui na hopi iregularidad cu ta sosode den prison. Tin un grupo grandi di cuidador cu ta traha cu alma y cuerpo pa cuida nan pan. Asina mes tin algun cu pa algun shen florin ta risca nan trabou. Probablemente ora cos pasa e minister lo actua, pero kizas e baca a hoga caba.
