29 di yanüari último komishon Desaroyo Sosial, Labor i Bienestar tabatin un kombersashon ku direktiva di Fundashon Tayer Soshal St. Martha (FTS) tokante e rapòrt di SOAB ‘Rapport inzake uitvoering operational audit Fundashon Tayer Soshal’.
Den e rapòrt ta duna un bista bastante preokupante pa ku e situashon finansiero i di maneho di FTS. Esaki a wòrdu ratifiká pa e direktiva di FTS tambe.Parlamento a risibí e rapòrt aki 9 di yanüari 2019.
Teniendo kuenta ku esaki, komo miembro di e komishon, mi kier hasi e petishon na bo persona den bo enkargo komo presidente di komishon di Desaroyo Sosial, Labor i Bienestar pa yama un reunion di e komishon i invitá minister di Desaroyo Sosial, Labor i Bienestar sr. Koeiman pa duna informashon ofer di e tema.
FTS, supsidiá pa gobièrnu, ta brinda un servisio di trabou adaptá na personanan ku un desabilidat físiko i/òf mental. Ta sumamente importante pa e servisio aki ta unu optimal. Ta pa esaki ta nesesario ku Minister Koeiman, por indiká ta kua ta su maneho pa ku personanan ku un desabilidat den sektor labor.
E kontenido di e rapòrt aki ta rekerí atenshon urgente pa e fundashon i ta importante pa tuma akshon rápido. Pregunta nan relevante pa ku esaki ta:
- Si Minister ya a tuma paso pa ku rapòrt di SOAB ‘Rapport inzake uitvoering operational audit Fundashon Tayer Soshal’;
- Si esaki ta e kaso, kua ta e paso nan ku a keda tumá;
- A informá FTS di e paso nan ku ta bai tuma, kua tabata nan reakshon riba esaki.
Mi ta spera di por konta ku bo aporte, pa ekstendé un invitashon na e Minister di Desaroyo Sosial, Labor i Bienestar sr. Koeiman pa den un reunion di komishon Desaroyo Sosial, Labor i Bienestar duna informashon tokante su vishon pa ku e personanan ku desabilidat den ámbito laboral i Fundashon Tayer Soshal St. Martha.
