Empleadonan di Hulp Bestuurskantoor San Nicolas a tene un protesta. Pa 7 aña largo nan ta bringando p’e situacion, cual ta problema di schimmel. Nan ta laga spuit e luga, pero tambe e empleadonan a bin compronde cu e luga ta afgekeurd y ainda nan ta keda eyden. Den e dianan aki nan no sa si tin bestia, pero ta pica e empleadonan. Esaki ta pone cu nan curpa ta habri y grawata. Segun un di e empleado, nan no por mas cu e situacion aki pasobra nan no tin oido.
Kico ministernan ta pensa di haci p’e situacion aki, e empleadonan no sa. “Manera semper atrobe, San Nicolas ta ultimo”, el a expresa. E empleadonan ta pensa cu porsaca nan for di e edificio aki y hinca nan den un otro edificio. E servicio di San Nicolas mester keda, pasobra tin hopi cliente hende grandi cu mester bin paga nan cosnan. Nan no por bay otro caminda y mester keda den San Nicolas. Ta pidi pa pone nan den otro edificio y pa sigui brinda servicionan.
E empleadonan di Hulp Bestuurskantoor San Nicolas kier brinda servicio, pero den e sistema aki nan por pasa e schimmel pa nan famia. Esaki ta algo cu nan no ta di acuerdo. Nan no a ricibi ningun contesta, pero a indica cu nan kier manda e empleadonan otro caminda y e servicio na San Nicolas ta drumi un rato.
No por cu e clientenan di San Nicolas ta keda sin servicio. Kier manda nan na e otro MFAnan, lagando San Nicolas sin servicio unda cu e hendenan grandi por paga. E empleadonan no ta di acuerdo pa esaki, pasobra tur ora San Nicolas ta keda ultimo. Esey no por tampoco y mester haci algo. Nan ta pidiendo pa manda nan den un otro edificio, tanten cu ta remodela e edificio actual. Tin otro luga cu por manda nan pa por sigui duna servicio na e publico di San Nicolas. E empleadonan a papia cu nan sindicato y nan tin cu warda pa haya sa kico mester haci.
