Sindicato ABV cu ta representa empleadonan di Dr. Horacio E. Oduber Hospitaal a yama un reunion general urgente diamars mainta na Hospital. Esaki el a anuncia un rato pasa despues di a sali for di un reunion cu Minister di Turismo, Salud Publico y Deporte, Dangui Oduber. Gina Maduro, Presidente di ABV ta sinti cu e situacion na Hospital ta escalando cada ora mas y cu mester bin un solucion pronto.
Segun Gina Maduro, e problema principal ya mal maneho di gerencia. Riba dje e Director di Cuido di Hospital, Ezzard Cilié a menasa e Presidente y Vice Presidente di ABV den un reunion, loke e sindicato awor no ta acepta di dje. Nan a bisa Minister Oduber awe cu ABV entodo caso no ta sostene e maneho di e gerencia actual di Hospital.
Pa awor e sindicato no kier bisa mucho mas, pasobra lo kier papia cu su miembronan prome. E reunion ey ta tuma luga diamars mainta 8:00am pafo di Hospital. Ey lo splica trahadonan di e ultimo desaroyonan y tambe scucha di e trahadonan kico lo bira nan siguiente paso.
Ta evidente cu un di e temanan cu ta cayente riba mesa awor ta e suspension y posibel areglo di retiro pa e Director Financiero di Hospital, esta mr. Theo de Kool RA. Si tur cos cana e caminda corecto, e siman aki ainda e abogadonan lo yega na firmamento di e pakete di retiro for di Hospital pa De Kool.