Aña pasa tabatin un dificultad cu e seguro Insure To Study p’e studiantenan cu ta sigura pa bay Hulanda. Tin caminda a acepta e seguro completo y otro caminda no, pero awo esaki ta regla. E mayornan e aña aki no tin ningun preocupacion, compara cu aña pasa.
Manera aña pasa, Departamento di Enseñansa Aruba (DEA) un biaha mas ta traha cu Insure To Study. Sharine Croes Dubero, Coordinador Studiefaciliteiten, a splica cu e studiantenan tabata liber pa scoge e seguro cu e ta desea. DEA a scoge Insure To Study pa motibo cu nan tin un Aruba plan. Esaki ta encera cu nan ta dek repatriëren, si algo pasa un hende. El a duna como ehempel cu si e tin un hende fayece y e ta paga ticket p’e persona bin bek, y no ta tur seguro ta duna esey. P’e motibo ey nan a scoge e seguro Insure To Study.
Pero e ley a cambia aña pasa cu na momento tur studiante of otro persona ‘schrijf in’ na Hulanda, tin cu bay den e basis zorgverzekering (seguro medico basico). Pero, nan no tabata sa na Hulanda con pa realisa esey. El a indica cu SVb Hulanda a haya e ley cu a cambia y nan no tabata sa con pa atende cu esey.
Awo tin mas claridad riba esey. Awo nan ta inscribi via Insure To Study of cualkier otro seguro, ya cu DEA ta acepta nan, pero ta importante p’e tin e reisverzekering (seguro di biahe) aden. Tambe e mester tin medische kosten, cu den esey mester tin e afsprakelijkheidsverzekering, y tambe eigen risico. Te unda Croes Dubero ta na altura, cu tur caminda ta acepta e seguro.
E persona mester bay den e Aruba plan. Loke si ta un problema ta cu na momento un persona ta ‘uitgeschreven’ na Aruba, e no ta haya un seguro di biahe facil. Insure To Study y AON si ta duna e seguro di biahe. El a enfatisa cu un persona por scoge e seguro cu e ta desea, pero mester tin seguro di biaha aden. Den pasado nan a pasa den situacion cu hende a kibra pia den avion, pero si un persona no ta sigura e ta un problema.
Na momento cu e persona ta inscribi na Hulanda, cu el a haya BSN number y tin un adres di vivienda, e ora por haci cambio p’e seguro medico basico. Di tin e seguro medico basico, no mester paga e eigen risico manera mester paga p’e otro seguronan.
Esaki ta algo cu ta conta pa tur studiante di mundo. Segun Croes Dubero, si tin un studiante di China cu ta bay studia na Hulanda, e ta conta p’e tambe. E ta conta pa tur persona cu ta bay biba na Hulanda, nan mester ta sigura bou di un seguro medico basico. Esaki ta bin desde cu e ley a cambia aña pasa.
