Loonsubsidie ta un herment cu Gobierno a bini cu ne na momento cu COVID-19 a bati na porta di Aruba. Dos aña a pasa desde pandemia di COVID-19 y Sociaal Verzekeringsbank (SVb), cu tabata e instancia encarga pa brinda e ayudo aki, ainda ta den e proceso di cobra e placa aki bek for di comerciantenan.
Ta papia di un suma basta grandi.
Gobierno, tempo cu a introduci Loonsubsidie esaki tabata cu e pensamento pa duna un man na esunnan cu a mira perdida den nan entrada.
Tabata controla esaki via Departamento di Impuesto (DIMP), pa medio di e formularionan di BBO entrega. Sinembargo masha hopi compania a haci uzo di esaki.
Na momento cu SVb a bay averigua, a resulta cu tin compania no a perde placa, of a perde benta manera nan a indica ora di pidi esaki y mester debolbe e loonsubsidie cu nan a haya. Por lo menos, e diferencia nan mester paga bek na SVb.
E tempo ey SVb ta pone cierto porciento y e compania ta pone un otro parti, mientras cu e trahado mes a bay di acuerdo pa baha su salario cu cierto cantidad di porcentahe.
Despues investigacion y evaluacion, a bin saca afo cu SVb a paga sigur un 94 miyon florin di mas, O sea companianan cu a tuma placa sin cu en realidad nan mester a bin na remarca p’esaki.
Pero tambe tabatin compania cu a haya placa di menos, y a entrega esaki n’e empresanan en cuestion. Ta papia den e caso aki di un suma di un tiki mas cu 15 miyon florin.
Den combersacion cu e director di SVb, el a bisa cu a ricibi caba rond di 45 pa 46 miyon florin, mientras cu tin mas cu 20 miyon florin den obheccion.
Tur esunnan cu a haya placa di mas, ta haya un areglo di pago pasobra ningun compania lo por paga esaki di un solo tiro.
Si mira atras awo, no por conclui otro cu Aruba a sali basta bon for di dje, cu un crecemento economico sorprendente, segun e cifranan suministra door di instancianan di Gobierno. E desaroyo aki a percura pa Aruba por sigui dilanti di un forma mas trankil, riba e tereno aki.
