Artista Sharina Gumbs ta presenta su exposicion di cuadra titula ‘The struggle to ride or die’. Esaki ta tuma luga na Biblioteca Nacional Aruba di dia 6 pa dia 20 di december.
E apertura ta tuma luga diaranson dia 6 di december di 5:00pm pa 7:00pm. Musico Franklin Arrindell ta duna e apertura su ambiente musical.
Sharina Gumbs ta artista visual, trahado social y docente di arte cu su Studio Soul2soul Mindful Art. Su propio estilo preferi ta abstracto expresivo. Pa medio di e estilo aki Sharina ta expresa su sentimento- y experencianan y alabes ta explora su mundo. Por lesa di su desaroyo personal riba su website y tambe riba su pagina di Facebook.
Publico ta bon bini pa bishita e exposicion na biblioteca na december. Esaki ta habri durante orario regular di biblioteca na Playa, di 8:00am pa 5:00pm y dialuna y diaranson te 7:00pm.