Gerencia di El Gaucho Restaurant a tuma nota di diferente storianan cu Sindicato FTA of su miembronan ta inventa den un of mas medio di comunicacion. Door di esaki no ta keda nada otro cu pa gerencia coregi dicho storianan.
El Gaucho Restaurant tabata pendiente di un reaccion door di FTA riba e ultimo proposicion cu a haci y hasta tabatin un afspraak planea riba diabierna 24 di november. Sinembargo, FTA a dicidi di cancela e afspraak y a sorprende El Gaucho cu un welga riba e mesun diabierna.
El Gaucho por medio di su abogado a purba di contact FTA riba diabierna mas cu 4 biaha via telefoon, prome y durante e welga, pero FTA no tabatin e decencia di contesta e telefoon of yama bek pa combersa y splica cualkier inkietud. Despues, e presidente Hose Figaroa y Ryan Giel tin e cuero di cara di papia den camara y bisa cu ni gerencia ni abogado a worry pa tuma contacto cu FTA of pa papia cu nan!
A organisa e welga y hasta blokia entrada di El Gaucho Restaurant. Esey naturalmente tabata y ta inaceptabel pa El Gaucho pasobra e miembronan di FTA no tin autoridad pa stroba hende pa move liber na Aruba of pa drenta of sali for di El Gaucho manera cu entre otro e lidernan sindical Figaroa y Giel a haci diabierna ultimo.
Ademas, nan of nan miembronan tawata “bully” of intimida e no-miembronan pa join nan accion iregular. FTA a hasta purba drenta e cushina di e restaurant sin permiso di gerencia y violando protocolnan di higiena. No obstante tur esaki FTA ta durf di bay papia di faltamento di respet. FTA ta ignora su obligacion pa su miembronan, djey ta escala tension y despues kier bay keha den media y hunga victima.
Un sindicato serio ta bin na mesa, sinta y negocia cu buena fe, no core pa sinta na mesa, busca smoesje y bay welga pa loco. Ta parce cu FTA kier negocia via media y no na mesa. El Gaucho a negocia via un forma respetuoso desde december 2022 te cu awo. Ta FTA ta esun cu a dicidi pa negocia den un otro forma.
Lamentabel ta cu e sindicato no ta cubri e “no work, no pay” y e tips cu e empleadonan ta perde ora di welga pa loco. Lidernan sindical si ta cobra 100% cu of sin welga!
FTA no ta transparente cu su miembronan pasobra despues di cu na diferente ocasion nan ta cancela reunion di negocacion of ta keda sin cumpli cu responde na tempo, manera palabra, awor nan ta purba tapa nan falta di palabra y di cumplimento door di culpa gerencia pa nan fayonan.
FTA su enfoke parce mas bien di un empresa cu kier cobra mas hopi miembrecia posibel y cu na caminda a lubida kico e trabou noble di un sindicato ta of ta suppose di ta. Miembronan di FTA ta haci bon pa wak si FTA ta transparente tambe cu e fondonan cu nan ta cobra nan miembronan y analisa con ta gasta esaki.
Maske cualkier welga ta afecta El Gaucho Restaurant, henter e team di El Gaucho lo keda haci su maximo esfuerso pa sirbi tur cliente den e temporada aki. Esey ta nos compromiso pa mas di 45 aña di existencia caba.
