Den un combersacion cu Parlamentario Tromp-Lee e ta indica cu desde diahuebs 22 di october 2021 a bin ta trata diferente ley den Parlamento. A cuminsa cu e presupuesto di DOW 2021, despues a sigui dialuna 25 di october 2021 pa e Ley di Integridad pa ministers, siguiente dia a trata cambio den e Landsverordening beperking tabaksproducten, diaranson a trata Prijzenverordening y a finalisa cu e Landsverordening goedkeuring van een nieuw Reglement van Orde voor de Ministerraad.
A aproba presupuesto DOW 2021, caminda durante di e tratamento un di e topiconan cu mas pregunta a keda haci riba dje tabata RWZI. Otro aspecto cu a haya su debido atencion tabata e funcionamento di DOW mes como organisacion. Con e diferente procesonan ta cana y con lihe nos hendenan ta keda yuda. Tromp-Lee ta bisa cu alabes Gobierno a presenta su lista di prioridad pa loke ta trata mantencion y construccion di diferente scol, cartera, rotonde y edificionan di gobierno. No obstante cu nos problema na Aruba ta hopi serio y complica, Gobierno lo sigui pone prioridad riba recuperacion di nos pais, pero den balans caminda semper lo pone e ser humano central y adicionalmente lo sigui inverti den nos infrastructura.
Dia 25 di october 2021 e Ley di integridad di ministers a pasa cu 19 voto na fabor y 1 en contra. Tur fraccion cu excepcion di Accion21 a vota pro e ley aki. Aprobando e ley aki porfin Parlamento ta manda un signal corecto na pueblo. Tromp-Lee ta bisa cu a bira ora tambe mirando tur e investigacionnan andando cu ta involucra politiconan. E caso IBIS cu a finalisa caminda un politico-minister a keda condena, investigacionnan andando manera AVESTRUZ, FLAMINGO DIAMANTE y ALOE. Un situacion cu ta subraya ainda mas e necesidad y urgencia di e ley aki. Durante e reunion aki Tromp-Lee a presenta un mocion cu a keda unanimamente aproba caminda e la urgi Parlamento pa den 6 luna di tempo percura pa crea y implementa un codigo di conducta pa Parlamento y tambe percura pa un concepto di ley pa hancra normanan di integridad.
E cambionan den e Landsverordening beperking tabaksproducten a keda trata dia 26 di october 2021. E cambionan proponi den e ley tambe a keda aproba unanimamente, caminda segun Tromp-Lee e cambionan mas importante ta cu: – lo prohibi humamento den areanan publico, – lo aumenta e edad di 18 pa 21 aña di edad pa por cumpra sigaria, – lo prohibi benta los di sigaria, – lo tin boet pa mayornan cu ta huma den auto den compania di menornan di edad. Gobierno a indica cu Cuerpo Policial ta esunnan cu tin e tarea pa controla cu cumplimento di e ley aki y cu lo bay tin sancion den caso di incumplimento. Un ley importante cu mester yuda den e parti di prevencion y cu ta hopi importante den cuadro di e plan nacional di prevencion cu ta wordo maneha pa e NCD’s stuurgroep.
Segun Tromp-Lee e ta di acuerdo cu Gobierno cu e ley aki ta specialmente pa proteha nos mucha y hobennan pa evita cu nan ta converti den un humado pasivo (secondhand smoke), cu consecuencia cu esaki ta 1. aumenta infeccion na horea, 2. aumenta crisis asmatico, 3. aumenta riesgo pa bronchitis, pneumonia, sintomanan respiratorio.
Otro Ley cu a keda trata y aproba diaranson dia 27 di october 2021 ta e cambionan den Prijzenverordening. Un ley cu segun Tromp-Lee a pasa relativamente lihe y cu primordialmente ta na beneficio y proteccion di e consumidor.
Pa finalisa diahuebs 28 di october Parlamento a aproba e Reglamento di orden di Ministerraad nobo cu mester a wordo adapta durante inicio di COVID-19. Segun Tromp-Lee gobernacion no por a para pa motibo di COVID pasobra tabatin hopi decision pa tuma. Pa es motibo mester a crea e posibilidad pa Gobierno bay traha virtual. Adicionalmente a haci algun cambionan chikito. E ley aki tambe a keda aproba unanimamente.
