Diabierna ultimo na IMAX Theater a celebra ‘SDG Flag Day’, unda tabatin varios dignatario invita. Lider di fraccion di MEP den parlamento, drs. Shailiny “Shai” Tromp-Lee a participa na e actividad organisa pa e comision nacional di SDG, cu ta para pa ‘Sustainable Development Goals’. Esaki ta e metanan pa logra un desaroyo sostenibel na nivel mundial.
Na september 2015 e Asamblea General di Nacionnan Uni a adopta e agenda 2030 dirigi riba desaroyo sostenibel cu tin cu conta pa tur hende cu ta biba riba e mundo aki. Esaki ta conta pa Aruba tambe!
SDGs ta encera un total di 17 meta cu tin cu fungi como guia pa yega na prosperidad y paz mundial. E metanan aki ta consisti di 5 pilar:
- E ser humano
- Planeta
- Prosperidad
- Paz
- Colaboracion
Un di e principionan fundamental di e metanan ta pa no laga ningun hende “atras”. E 17 metanan ta:
- Fin na pobresa
- Cero hamber
- Bon salud y bienestar
- Educacion di calidad
- Igualdad di genero
- Acceso na awa limpi y sanitario
- Energia limpi y pagabel
- Trabou decente y crecemento economico
- Industria, Innovacion y Infrastructura
- Reduccion di desigualdad
- Ciudad y comunidadnan sostenibel
- Produccion y consumo responsabel
- Accion pa e clima
- Bida bou awa
- Bida riba tera
- Institucionnan solido pa paz y husticia
- Aliansa pa logra e metanan
Manera Antonio Guterres, secretario general di Nacionnan Uni, a bisa: “Mundo henter ta encontra nan mes den un momento critico pa loke ta trata e metanan di desaroyo sostenibel. Mas di un aña despues di e pandemia mundial cu nos ta aden, miyones di hende a perde nan bida. E consecuencia pa e hende y pa nos economianan no tabatin precedente y e esfuersonan pa logra recuperacion te awor tabata desigual, tin ora hasta inhusto y no ta suficientemente orienta riba e metanan pa logra desaroyo sostenibel. E crisis mundial ocasiona pa e pandemia ta un menasa riba tur avance y desaroyo logra te cu awor. E situacion actual sigur lo retrasa aun mas cu nos ta bay logra e metanan na 2030”.
“Asina mes mi ta uni mi mes na e expresion di nos Prome Minister cu pa Aruba e SDGs ta keda un prioridad, a pesar di e retonan cu nos tin como pais chikito. Awor mas cu nunca nos mester keda determina pa Aruba, hunto cu mundo henter, traha den bon colaboracion pa logra e metanan di SDG y brinda paz, prosperidad y un planeta sano pa un y tur”, asina parlamentario Shailiny Tromp-Lee a expresa.
Door di duna atencion na e di 6 aniversario di e metanan di desaroyo sostenibel, Aruba tambe ta subraya nan importancia y ta enfatisa cu ta henter comunidad, incluso nos gobierno, parlamento, sector comercial y NGOnan, hunto mester sigui enfoca riba desaroyo di solucionnan innovativo y sostenibel pa Aruba.
“Un area cu sigur a keda afecta grandemente door di e pandemia ta nos enseñansa. E enfoke mester ta dirigi pa percura cu tur mucha ta haal in e retraso y ta prepara debidamente pa sigui cu nan estudio exitosamente”, asina e lider di fraccion di MEP den Parlamento, a termina bisando.
