Director di Biblioteca Nacional Aruba (BNA) Astrid Britter ta bisa cu debidamente a contesta e ciudadano cu tin mal contento pa cu servicio of e atencion cu el a haya di BNA.
Den un otro articulo por lesa e malcontento cu ta existi cerca un ciudadano pa cu Biblioteca Nacional Aruba. Su malcontento ta pasobra a aproba e uzo di un cashi pa mustra materialnan relaciona cu Dia Internacional pa Derecho di Mucha. Y despues a hala atras. E ciudadano a bisa cu e director no kier atende cu ne of ta sconde p’e, algo cu sra. Britten a nenga categoricamente.
E director di BNA ta bisa cu e ta conoci cu e caso aki cu a tuma luga aña pasa den luna di november. E mes no tabata na Aruba e tempo ey. Y na inicio di e aña’ki a haya un notificacion di e situacion andando. “Mi a mand’e un email riba su preocupacion pa cu uzo di un cashi. Eyden mi ta splic’e kico a pasa. No ta etico pa mi bay interno riba locual mi a skirbi na e ciudadano. E ta parti di e privacidad. Pero tur medaya tin dos banda.”
Ademas di e email, e suplente di sra. Britten a atende cu e ciudadano malcontento. “Pero kisas e contesta cu el a haya no tabata esun cu e kier a haya. E situacion ta un poco diferente den otro.”
No mester lubida cu BNA tin espacio publico y tin regla pa uza di material den e edificio. No por yega uza e espacio, pasobra tin procedura pa sigui. “Pa mi e ta un caso cera awo,” tabata palabranan di sra. Britten.
