De un carta fecha dia 20 di juli 2020, cu ya a sali riba caya caba, Serlimar a dirigi su mes na tur contratista independiente trahando pa e proyecto “Mantencion Bo Bario”, den cual ta informa nan cu ta adapta nan orario di trabou. Nan lo traha menos ora, locual ta traduci den menos pago tambe. Esaki ta den un esfuerso pa e compania baha su gastonan y purba salba su operacionnan.
Director di Serlimar, Ir. Anko Koopman, a corda e contratistanan cu e compania ta pasando den temporada di retonan financiero hopi dificil, incluyendo e Surseance van Betaling, den cual mester purba reduci gastonan mas tanto posibel. Y den e lista di cortamento di gasto, tambe ta inclui e contratistanan cu ta traha banda di caminda of ta mantene barionan limpi.
Nan orario nobo ta bira dialuna, diamars y diaranson lo traha 8 ora. Riba diabuebs y diabierna lo traha 4 ora so. Cu esey e compania ta logra reduci 8 ora di trabou, cu ta traduci den reduccion di 20% di e pago mensual. A pidi e contratistanan comprension pa e situacion cu Serlimar ta pasando den dje, pa hunto purba sali for di e situacion cu nan ta aden actualmente.
