Covid-19: Bahamas a cera frontera bek pa turistanan Mericano

4927

Den menos di tres siman despues di reapertura di nan frontera cu bishitantenan internacional, awe diadomingo Bahamas a anuncia cu diaranson awo nan ta cera tur frontera, tanto aeropuerto como waf, cu turistanan procedente di Merca.

Bahamasair, e aerolinea nacional di e pais, lo stop di bula inmediatamente pa Merca, asina Minister Presidente Hubert Minnis a bisa awe den un discurso nacional. Ta bon pa aclaria cu lo sigui permiti vuelonan saliendo for di Bahamas si, pa garantisa cu turistanan por bandona e isla y regresa Merca bek, hasta si ta despues di diaranson. Turistanan for di Canada, Inglatera y Union Europeo si ta sigui bonbini, contal cu nan por mustra un test negativo pa Covid-19, haci den 10 dia prome cu nan a yega Bahamas. Tambe nan lo sigui permiti turistanan yegando riba vuelo cu jetnan priva, charter of yatenan di placer.

“Lamentablemente e situacion aki na cas a deteriora di tal forma desde cu a habri nos economia domestico”, asina Minister Presidente Minnis a bisa durante su discurso nacional un rato pasa. Mester bisa cu e mesun Minister Presidente ta fungiendo tambe como Minister di Salud Publico desde luna di mei ultimo. “E situacion a deteriora riba un ritmo preocupante desde cu nos a habri frontera pa turistanan”.

Bahamas ta consisti di mas o menos 700 isla chikito band’i otro, caynan y rif riba unda hende ta biba of frecuenta. Hunto nan ta midi 13,878 km2. E ta situa den Ocean Atlantico banda di Cuba, Haiti y Santo Domingo, cerca di e estado Florida di Merca. Nassau ta capital di e isla New Providence. Tin 385.630 habitante riba e islanan segun Censo na 2018. Ta considera e isla aki como un di esunnan di mas rico den continente Americano, despues di Merca y Canada. Nan economia, mescos cu nos, ta basa puramente riba turismo y financiamento offshore. Bahamas a haya independencia for di Inglatera na aña 1973 y tin un democracia Parlamentario, tin un Gobernador y Conseho di Minister. Reina Elizabeth II keto bay ta na cabes di e Monarkia bou unda nan ta resorta keto bay si.