SEPPA den pasado, a hiba diferente reunion cu gobierno pa loke ta Serlimar, mientras cu miembronan tabata para pafo di bestuurskantoor. Segun Edmundo Marlin di SEPPA, en berdad nan ta hibando un lucha pa mehora e posicion huridico di e trahadonan na Serlimar. Un di e cosnan cu ta keda para ariba dje ta cu Serlimar tin cu keda un compania cu ta esun cu tin cu atende cu desperdicio aki na Aruba. Pa locual ta trata e posicion huridico di e trahadonan, SEPPA ta monitor e situacion aki hopi di cerca, entre otro e organisatie structur, esta e structura di e organisacion, caminda cu momento cu ta mira cosnan no ta cana, nan ta tene reunion cu e gerencia y locual den pasado tabata tin diferente reunion pa esey.

Tambe e asunto caminda e trahadonan nan derecho ta wordo trapa, SEPPA ta mustra gerencia cu esey no ta e forma con pa anda cu e trahadonan aki.

Marlin a sigui splica cu e trahadonan awor aki ta bezig ta wak kico ta pasando y kico lo bay ta e futuro di Serlimar. Basa riba esey, por bisa cu SEPPA ta para 100% tras di e trahadonan pa esey.

E otro punto cu kier mustra riba dje, ta cu e trahadonan awor aki, locual cu nan kier wak, basa riba e gobierno nobo cu a sinta, kico gobierno ta bay haci cu Serlimar.

Problematica di dump

Marlin a comenta cu awor aki e gobierno nobo cu a sinta, a instala un werkgroep y e werkgroep aki mester a bay atende cu e asunto con pa atende cu e problematica di dump. Esey tabata un di e problemanan hopi grandi. E werkgroep aki a trece diferente punto, un total di 24, caminda cu e minister awor aki a haya e rapport eynan y e minister tin cu bay sinta den ministerraad pa atende cu e cosnan aki, kico ta bay bira a corto, medio y largo plazo. Un di e cosnan cu e gobierno a duna di conoce caba y esey ta un bon noticia te awor aki, cu ta Serlimar ta esun cu ta bay maneha e asunto di stortingplaats, esta e dump, y cu esun cu ta bay haci e trabao ey ta e trahadonan di Serlimar.

Pa loke ta Parkietenbos, tin recomendacionnan, unda cu gobierno tin cu tuma un decision pa e desperdicio cu ta bayendo eynan, stop di bay eynan, pasobra e no por acapara mas sushi eynan. Gobierno a indica un luga caba cu ta Sero Tijshi, caminda e sushi lo bay. Pero prome cu e yega eynan, nan lo bay separa e sushi y e sushinan lo wordo poni den bales y e balesnan ey lo wordo hiba na Sero Tijshi.

Gobierno tin cu tuma decision pa dicidi precies kico e ta bay haci.

Solucion

SEPPA semper a boga pa bin cu un manera con pa atende cu e sushi. A tuma nota diferente biaha, e sistema con e sushi ta wordo atendi cun’e na dump y a hasta bay asina leu di pidi gerencia pa e trahadonan haya e proteccion necesario pa atende cu e sushi. Pero despues di a sinta den e stuurgroep aki, a bin compronde cu e forma di atende cu e sushi awor aki, no ta cumpli cu normanan internacional. Basa riba esey, tin cu bay cambia e sistema ey di atende cu e desperdicio, pasobra bo tin desperdicio di cas, pero bo tin desperdicio comercial tambe. E parti ey ta acapara 80%, pero e otro 20% cu ta taira, hero, mata, desperdicio medico, cual ta un otro problema, e forma con eseynan ta wordo poni riba e landfill, no ta e forma corecto, pasobra na cierto momento e ta crea un situacion caminda bo tin cu wak e salud di e trahado, pero tambe e salud di e vecindario.

Esey ta un di e preocupacionnan for di principio, pa wak con ta bay atende cu e asunto di dump. Pesey mes, durante gobierno anterior, ora cu e minister varios biaha a papia di cera dump, a bisa, cu pa dicidi cera dump, mester tin solucionnan con ta bay atende cu e desperdicio. No ta zomaar por yega cera un dump, sin por tin solucion con ta bay atende cu e desperdicio, cu ta yega riba e dump eynan.