Mayoria cosnan clandestino ta bin for di cierto pais. Segun Louis Kirindongo di Guarda Costa, dimes nan ta haya e presion ta bin for di e bisiñanan parti zuid, di paisnan manera Colombia, Venezuela y tambe rato rato ta haya cu esunnan di otro paisnan den e region. Hopi biaha ta un ruta tin. Hopi biaha bo ta haya cu e trafico di cosnan manera droga, arma, ta bin for di e parti mas abao di America y tur ta purba di infiltra y yega mas ariba posibel na e continente pa asina ey, caminda cu tin mas placa pa e productonan cu nan ta bezig ta deal den dje.

E ta normal cu bo ta mira e fluho eynan ta pasa practicamente tur caminda. Mas nort nan bay cun’e, ta mas placa tin den dje. E ta pasa parti Africa, cu Europa tambe. Nan tur ta purba hiba e producto caminda cu tin mas demanda y caminda cu tin mas placa tambe cu por paga pa e producto. Guarda Costa tin e mesun influencia. Tin cu keda skerpi den e area eynan. Esey ta un di e areanan cu sigur ta tira bista riba dje diariamente den nan trabao.

Embarcacion

E embarcacion di Guarda Costa ta completo. Nan tin e Super Rhib, e Super panter cu ta patruyando, nan tin avion y helicopter. Tambe dentro di pronto ta bay ta hayando tambe nan botonan nobo cu ta e Metal Sharks, cu ta botonan bon ekipa pa por haci e trabao cu Guarda Costa tin cu haci riba lama y esey ta en espera di dje. Dentro di poco pueblo di Aruba por mira tambe e boto aki yega y lo ta den servicio pa yuda proteha nos costanan.

Personal

Personal di Guarda Costa lo bay pasa training. Mirando cu ta un boto nobo, cu ta sistemanan nobo cu ta bay tin riba dje, tanto pa loke ta trata nabegacion y tambe cu e parti tecnico, lo ta mandando di parti di Aruba, algun personal pa training, pa asina ey nan por wordo opgeleid den e sistema cu e boto ta opera y asina eynan tin e conocemento den cas. Esey ta e intencion cu e personal ta bay haya training y ora cu e boto yega, ya nan por ta capacita pa por opera e boto aki tambe.

E otro botonan

E otro botonan, segun Kirindongo, no ta claramente defini kico lo pasa cu nan. E botonan ta den condicion, nan ta nabegando keto bay. E botonan a sirbi basta aña. E botonan a draai mas cu suficiente y keto bay nan tey pa haci e trabao. Keto bay nan ta den condicion pa haci e trabao. Pero ora cu ta trata di lama, boto, e salo, e solo, olanan, tur eseynan, tur ta haci influencia hopi grandi riba nan durabilidad. Awor aki si a mira, como Guarda Costa, cu a yega ora pa reemplaso. E aña aki, durante curso di henter e aña, lo haci e reemplaso di e Super Rhibnan, pa e Metalsharknan. Guarda Costa tey 24 ora pa dia. Nan tey pa duna servicio. Si tin cualkier cos cu pueblo tambe por mira. Esey tambe ta hopi importante. Como pueblo, bo por mira cosnan cu bo ta bisa cu esaki ta bale la pena pa meld esaki, haci’e libremente. E number ta facil, 913. Bo ta haci e yamada eynan y eynan tin hende 24 ora pa dia. Nan ta tuma e yamada, ta tuma e melding y abo loke bo tin cu haci ta simplemente observa. Mira kico a pasa, of kico ta pasando, na unda. Si ta boto, ki tipo di boto, cuanto hende riba dje. Banda di cua lama e ta, banda di cua boca. Duna Guarda Costa mas tanto informacion cu ta posibel y Guarda Costa lo percura pa un patruya por yega y haci e trabao cu nan tin cu haci na e momento ey.