Un barco a keda cu basta daño y varios trahador a scapa y mester gradici Dios cu nan ta na bida awe. Eror di un empleado no certifica pa atende cu e ekipo di trabou of e crane specific aki, a ocasiona un incidente na momento cu tabata descargando un barco. E barco Hollandia ta keto bay mara na waf di Barcadera despues di e incidente di diabierna. Un parti cu ta na e crane a los bin abou den bodega di e barco di container. Eynan tabata tin cuater trahador trahando y pa puro suerte nan a scapa. Parce gerencia kier tene e cos keto. Un situacion asina lo costa ASTEC basta placa. E trahadornan a notifica nan sindicato tambe cu awor parce ta prefer di keda keto riba e asunto. E trahadornan ta basta disgusta cu henter e sucedido. Trahadornan a mustra cu gerencia di ASTEC ta purba spaar placa na overtime y laga hende no certifica traha cu e crane cu a ocasiona e incidente. E trahadornan ta haya hasta cu actuacion asina di gerencia ta hopi iresponsabel djis pa spaar placa na overtime. E gastonan pa e daño cu a keda atras na e barco ta hopi grandi.
