Scolnan publico prome cu 2009 tabata resorta bou di Contact Bureau Openbaar Onderwijs, un afdeling di Directie Onderwijs. E tempo ey caba tabatin discusionnan na unda abase di conseho a independisa e maneho di scolnan publico den un departamento di gobierno cu su mesun diensthoofd, los di directie onderwijs.
Bo ta haya docentenan y otro grupo di trahadornan cu tin un Landsbesluit den nan man ya cu prome cu a ‘independiza’ maneho di scolnan publico for di Directie Onderwijs ya nan tabata traha pa un of otro afdeling bao di Directie Onderwijs y a wordo nombra Ambtenaar.
Den reunion cu Minister Rudy Lampe, SEPPA ta wordo informa cu den punto 1 di Programa di Gobernacion, e gobierno actual lo kier introduci un sistema di calidad den enseñanza y den cuadro di esaki lo cambia leynan pa Stichtingen por funciona abase di “Good Governance Principles”. Segun Minister Lampe na e momentonan aki gobierno no tin autoridad riba e otro Stichtingen (SMOA, SKOA, SPCOA) y pa e motibo aki kier bin cu un model Stichting cu mester ta e ehempel pa otro Stichtingen. E speransa di Minister ta cu NAN lo cuminsa funciona mescos cu e Stichting nobo.
Loke ta hala nos atencion ta cu no ta wordo bisa den e programa di gobernacion cu ta e Maneho di Scolnan Publico mester wordo independisa! Sino ta papia di Hisa Calidad di Enseñanza y funcionamente abase di “Good Governance Principles”. Principionan cu sigur tur hende mester por ta di acuerdo cu nan, pero esakinan mester bin for di ariba bin abao. Pero pa e Minister na e momento aki e unico solucion cu ta mira ta pa hisa e calidad di nos enseñanza ta pa aparentemente Independiza DPS y hacie un Stichting.
Segun Minister asina e ta logra hasi enseñanza independiente di politiek. Y den tur conferencianan di prensa, intervieuws esaki ta keda menciona. Sinembargo e punto aki no ta keda specifica kico lo kiermeen cu saca politiek for di scol publico.
Minister di enseñanza ta un politico activo y awor aki loke su expresion ta haci ta crea duda, of por wordo interpreta cu tin politica den e dienst, mientras cu e politico mes ta e na nivel di bevoegd gezag. Na final, Pais Aruba ta keda responsabel pa enseñanza publico.
No tin otro conclusion cu loke e Minister of gobierno ta purbando ta di schuif su responsabilidad como gobernante riba e bestuur completamente nobo di e Stichting cu e lo lanta. E cuestion ta si e ta asina simpel si of no,manera ta wordo papia of simplemente combirtiendo DPS den un Stichting.
