Awe mainta tempran 24ora.com a subi riba rednan social e caso di un mama di dos yiu “secuestra” door di Trudy Hassell di Warda Nos Costa. E famia ta papia di “secuestra” pa motibo cu no tin motibo pa mantene deteni.
E intencion tabata pa awe den oranan di mainta pa bay Corte pa ordena Trudy Hassell / WNC laga e señora, kende tin un peticion di asilo, den libertad, despues cu no a logra cu intermediacion policial. Finalmente Abogado y famia a dicidi di acerca Minister di Husticia, kende a bisa cu mester cumpli cu decision di Corte.
Sinembargo ni asina a logra haya libertad di e señora pa cual a tuma contacto cu 24ora.com pa un biaha mas demostra cu e directora di WNC no ta cumpliendo cu ordo ni decisionnan tuma den e caso. Finalmente casi 24 ora despues di e decision di Corte, e señora a wordo laga liber y a reuni cu su yiu muhe, familiar y amigonan cu tabata sper’e pafo. “Hopi danki 24ora,” nan a expresa na final.
E famia ta pensa cu simplemente Hassell, y niun otro hende, tabata buscando un motibo pa trata di keda wante cera, pero cu tanto presion finalmente a laga e señora den libertad.
A lague den libertad, pero a pone firma un documento na Hulandes, cu e no ta compronde. Na final aparentemente a pone firma un documento cu e ta “meld” tur dia 10’or na sede di WNC na Sabana Berde y cu e mester bandona Aruba prome cu shete dia sino e por wordo deteni y deporta di e isla. Na momento cu el a sali y cu esnan pafo a realisa kico a pon’e firma, sin presencia di un Abogado, esaki a causa rabia y consternacion. Nan lo sigui cu e lucha awo, a keda expresa.
