Den e ultimo dianan aki a nota con ATCO Aruba ta poniendo container riba otro na unda antes tabata Drive-In na Balashi y cu den algun siman mas ta habri su portanan di nobo. E lo yama “The Movies @ Drive-In”. A nota 10 container di 40 pia cada un di cual a pone dos banda otro y 5 riba otro. Esey lo bira e base pa e screen for di unda automobilistanan lo por mira pelicula sinta den nan auto cu nan famia of pareha.
Fuentenan yega na e construccion a conta nos cu e containernan ta yena cu “peso” pa sigura cu e base tin e forsa necesario. Tambe a pone un fundeshi den cual e containernan ta ancra den dje, pa por soporta e biento fuerte cu ta supla eybanda. Tambe a nota cu ta trahando un cura rond di e cura mientras cu ta kedando cla cu e restaurant patras unda por cumpra cos di bebe y cos di come.
Un fecha pa apertura ainda no tin pero lo ta den e luna aki ainda, manera tur preparacion ta mustra. E reto mas grandi ainda ta keda pelicula mes, pasobra henter e industria ta practicamente paralisa dor di e pandema y e situacion economico. Asina mes tin varios pelicula cu lo por pasa riba pantaya grandi, incluyendo pelicula local, pa duna clientenan un variacion y opcion den tipo di pelicula. Aunke cu no a confirma nada ainda, nos a compronde cu e intencion ta pa cobra pa auto y no pa cada persona, asina pa evita cu mester purba pasa cu hende den bahul of scondi drumi abou den auto.
